Vawiin chawhma dar 11:00 khan ZPM chuan Party Office-ah chhung inkhawm hun kan hmang a, he hunah hian Pu K.Sapdanga, Working President chuan, “Inthlan dawn apiangin eng thli nge tleh tih kan ngaihvenin kan inzawt thin a, Party hlun pahnihten nasa taka min beihrawn karah tun tum inthlan dawna mitin sawi chu ZPM thli a tleh tih a ni. Party thli tleh a piangten sawrkarna an chang thin,” a ti.
Pu K.Sapdanga chuan, “Inthlan puan hnu, SEDP sem theih loh hnu ringawtah member thar 10000 chuang kan neih belh tawh a, a tam ber hi ruling MNF atangin a ni. Party pahnihin na takin min beihrawn a, kan hotupa Pu Duhoma sawichhiatna atan Press Conference te an ko hial a, MLA Fund eiruah rinthuin an puh, a ei ruk loh zia finfiahna kan hmu nghal a. A thusawi tluantling lova tan chhumin, a sawi tum loh an theh darh sak a, hetiang taka inbeihna hi UT kan nih atang tawhin a la thleng ngai pawhin ka hre lo. BJP nena sawrkar siam tumah min puh a, May 17, 2023-a Headquarters Executive Committee chuan BJP nen thawhho kan tum loh thu Resolution kan lo siam tawh. Eng ang pawhin min puh mah se, min puhtute pawhin an awih lo a, BJP pawhin an awih lo a, keini phei chuan kan awih lo lehzual. Sawrkar inring loten sawrkar intawm a awm dawn tiin party mal sawrkar siam phak an awm dawn loh thu an vawrhdarh a, vawikhat mah coalition sawrkar a la piang lo. Inthlan dawna thli nei apiangin majority sawrkar an din thin zawk a ni,” a ti.
ZPM Working President chuan, “Corruption laka fihlim turin ZPM candidate-te kan intiam a, October 24, 2023 khan Val Upa Council huaihawtin chham leh ziakin kan intiam leh bawk a. Kan intiam angin hlemhletna lakah kan fihlim em tih mipuite fiah turin kan inchhawpchhuak ngam a, ram rorelnaa Pathian ram tundin kan tum a, chu chu kan tum No.1 a ni a, min fiah a, min enchhin turin mipuite kan sawm a ni. Hmasawnna a tan tlat chhan chu eirukna vang a ni a, corruption tel lovin fim takin ram kan kaihruai dawn a, chutiang tur chuan min kaihruaitu tur kan Leader hi kan ringtawk a ni. Kan sawrkar dinglai hi a vanduai khawp a, hengahte hian a thutiam a hlawhchham a, pawi kan tihpui takzet. Mau Policy-ah cheng vaibelchhe 6.48 hman ral hnuah an ngawihsan hmak a, cheng nuai 3 sem an hlawhchham a, CM-in nuai thum sem a tiam laiin minister pakhat chuan nuai thum sem an tiam loh thu a sawi ve leh a, eng ber nge awih tur hriat a har hle. PAHOSS a hlawhchham a, mi hausate insakna tur pekbelhna mai niin PAHOSS in kawtah traffic a jam luih luih mai a ni. Kawng chhawng hmel kan la hmu lova, kan CM-in May 2019 atanga AR-te insawn chhuak tawh tura a sawi tun thlengin an la insawn lova, Health Care policy-a sum luan ral tam zia leh a hlawhchham chian zia mi tinin kan hria. Kan party thil tum chu Ram rorelnaa Pathian ram tundin a ni a, Pathian ram a thlenna hmunah hlemhletna a awm thei lo. Hlemhletna laka roreltute an fihlim phawt chuan, a hnuai lamah corruption hi a tlangnel theih kan ring lo. Tun tum inthlanah hian sum a leng leh viau dawnin a rin theih a, mahse sum hian mi thinlung a lei thei tawh lo ang tih kan beisei. Lunglei mipuite rinawmna leh huaisenna kha i hre reng ang u,” a ti bawk.
