ZPM Ṭhalai chuan thuchhuah siamin, “MNYF President Dr.L.Thangmawia’n ni 23.1.2023-a Hnam Run-a an party inkhawmah, SEDP dawng tur thlan chungchâng sawiin, ruling leh opposition bialah SEDP dawngtu inzat ṭheuha ruahmana nih thu a sawi chu mipuite zah lohna leh mipuite hruai kawi thei ṭawngkam niin ZPM Ṭhalai chuan kan hria.
“SEDP ah hian ruling leh opposition inthliarna nasa tak awmin, Local/Village Level SEDP Committee-ah MNF kaihhruai L.C/V.C ah chuan MNF LC/VC-te hruaitu an nih mai laiin, ZPM kaihhruai L.C/V.C-ah te chuan ZPM L.C/V.C te thlimin MNF party mi chairman a ruat an ni, he thil avang pawh hian MNYF President thusawi hi awih harsa kan ti hle.
“Kum 2018 inthlanpuiah khan SEDP cheng nuai 3 sem chu MNF party hruaitute intiamna a nih laia vawiin thlenga chhungkaw harsa zawkte hnena cheng nuai 3 sem a la ni lo chunga an term tawp dawn lamah pawh hetiang thu ho mai mai MNYF President-in a la au chhuahpui hi zah tawrh chak thlakah ZPM Ṭhalai chuan kan ngai a, chhungtin hnenah an lo intiam tawh angin kumin inthlan hma ngeiin nuai 3 aia tlem lo, nuai thum chung lam sem turin MNF sawrkar kan phut a ni,” a n ti.
