Kum 2025 Local Council leh Village Council inthlan zawh fel taka Mizoram hmun hrang hranga lawmthusawia zin Pu Lalnunmawia Chuaungo, Senior Vice President chuan vawiin February ni 27, 2025 (Ningani) hian Hrangturzo East Block huam chhunga Congress Party Village Council member thlan tlinte chawimawina hun Lersia Hall, North Vanlaiphai-ah a hmanpui.
He hun hmanpuitu Pu Lalnunmawia Chuaungo, Senior Vice President MPCC chuan, ZPM kum khat sorkarah mipuiten beiseina an nei hniam nghal hle a, Congress Party-ah inrintawkna nasa takin a thleng a. Aizawl leh Lunglei khawpuiah mipuiin Congress-ah rinna an nghat a. MLA leh MP inthlan aiin Congress Vote share nasa takin a pung a ni. Heng hi hruaitu tha, tling leh Pathian tih mi, mahni intarlan tum ngai lo Party President Pu Lal Thanzara kan neih vang a ni. MFA a hruai lai pawhin Mizoram football-in a vanglai a thlen pui a, President a nih loh hnuah Mizoram Football-in hniam lam a pan tih sawiin, Party dang hruaitute erawh thubelhchian dawl lo an sawi fo tawh thin sawifiah reng renga hun hmang an ni a. Heng hian kan hnam a ti zahawm lo a ni, a ti.
ZPM sorkarin Vantlang sum, kan zavaia sum an enkawl dan chu a fuh lo hle tih sawiin, Pu Lalnunmawia chuan an nawm an maka an hman mai mai tur a ni lo. An in tiam ang ngeia fel leh tha taka hman hi an tih tur a ni. Hmunphiah chingtute dinhmun an tikhaw lo zo a, Sawhthing tih ral dan an sawi dan thenkhat phei chuan tlakranna a thlen dawn bakah a hralh leh a lei kawngah an chiang lo em em a. Sorkarin a tih dik lohah kuthnathawktute mawhpuhin thiamloh a chantir a, hei hian an mahni duhsak taka vote tlingtu mipuite rilru thuk takin a hliam sak a. ZPM sorkarah mipuiin beiseina an nei tlem tawh hle a ni, a ti.
Mizoram mipuite tan NLUP chu tangpuihna nena kaikawpin ruahmanna fel tak nen sorkarna chelh hun pawha kalpui mai theih turin siam a ni dawn a, Mizoram hmun hrang hrangah zirchianna neih mek a ni, tih sawiin Pu Lalnunmawia chuan ZPM sorkarin an Campaign laia engkim Research base veka hmala nghal tura in zuar kha an arkhawthimdai a, Hmunphiah chingtute dinhmun an tihchhiat sak a, Sawhthing chungchangah kuthnathawktute’n man man taka an hralh hi Congress party chuan a duhsak em em a. Mahse heti mai maia sorkarin Sawhthing lei leh hralh a kalpui hi kuthnathawktute pawi nasa takin an khawih dawn. Mipuite kaihhruaina kawnga an tlin ngang lova, an term hi an hmang tluan thei dawn pawha a lan loh avangin a kaihruai thei Congress Party hi kan inbuatsaih mek a ni, a ti bawk.
