Serlui Constituency leh Kolasib Constituency tlawha zin mek Pu Lalnunmawia Chuaungo, Sr. Vice President, MPCC chuan vawiin April ni 9, 2025 khan Vankhuma Shopping Centre Hall, Kolasib-ah Congress hruaitu kalkhawmte hmaah NLUP changtlung zawka kalpui leh a nih tur thu a sawi.
MPCC Sr. Vice President chuan, “Congress in a ngaihpawimawh ber chu miretheite leh kuthnathawktute chawikan hi a ni a. Mizoram hmun hrang hrangah NLUP aṭanga bul ṭan, vawiin ni thlenga eizawnna atana la hmang chhungkaw sang tam tak an awm. Hei hi Congress Party in kuthnathawktute tana a tih thil lawmawm tak a ni a. Congress Party in Sorkarna kan chang leh a nih chuan NLUP changtlung zawk leh ṭha zawk kan kalpui leh dawn a ni,” a ti.
Pu Lalnunmawia Chuaungo chuan, kuthnathawktute chungchang sawiin, “ZPM te chuan kuthnathawktute hnenah sawhthing kan lei dawn, hmunphiah kan lei dawn tiin an intiam a. Kuthnathawktute’n kawla ni chhuak chhiara hnathawkin sum leh pai, tha leh zung tam tak an seng a. Mahse, an thar chhuah chu Sorkarin a lei sak leh thei si lo. Sawhthing chingtute an mangang tak zet a, a thar tam apiang mangang nasa a ni mai. Hmunphiah lah a hmaa rate ṭha tak ni ṭhin kha Sorkar a inrawlh avangin a rate a chhe ta vek a. An hmunphiah thar te pawh keh in awmzia a nei lova, an lainatawm tak zet a ni tih sawiin Pu Lalnunmawia Chuaungo chuan, Sorkar chu mipui bumtu ni lova, dawmkanga retheihna ata chawi chhuaktu tur a ni zawk a ni,” a ti bawk.
