Vawiin March ni 10, 2025 (Thawhtanni) hian MNF party chuan an office Mizo Hnam Runah chhung inkhawm an nei a, he hunah hian Pu K.Lalrinliana Ex-Minister & Adviser MNF General Headquarters leh Prof.F.Lalnunmawia Ex-MLA & General Secretary MNF General Headquarters-ten thu an sawi.
MNF Adviser Pu K.Lalrinliana Supply Minister hlui chuan, “India ram State-ah oil depot neilo awm chhun kan ni a, kan hun lai khan neih ve tul kan ti a. A hmun turte Bairabiah ruahmanna kan siamfel a. Aizawl chhak lamah awm se tiin anmahni lamin an rawn rawt leh a. Department hrang hrangte nen meeting neiin kan tifel a. A tak ram kan thleng tep a, inthlan a lo hun leh ta mai si a. Union Minister in hawng se tiin Prime Minister hriatpuinain rawtna kan siam a. Hmanni lawka Session ah Minister-in a chhanna kha a mak ka ti, ‘Prime Minister hawn tir an tum’ a, a ti a, vawi khat mah PM in hawng se tih kan sawi lo hrim hrim. Hna thawk ho lutuk leh engmah ti lo angah min puh kha a mak hle mai. Sokar hmasa thil tih that pawh an tih angin an sawi duh zel. Kolasib Hospital pawh Pu Thangtea khan hawngin a hna pawh thawh zawh deuh thaw tawh a ni a, an bul tan angin Press Release an siam ngamte kha a mak ka ti. Rice milk kan hawn tawh hun rei tak kal pui tawh pawh an sorkar tharah an hawng thar leh. An kalphung hi ‘kal phung thing’ a ni ringawt a lawm,” a ti
Pu K.Lalrinliana chuan ZPM sorkar thar chu kalphung hlui ai pawha tenawm zawk a tih thu sawiin, VC inthlan dawn khan Kolasib veng tharah chhungkaw hung ve deuh pakhat chhungkua atangin zirtirtu transfer chungchangah an chhungte ZPM lut tura an inthlem nasat thu a sawi a, MNF chu Pathianin min hruai zel ang a, kan tho chhuak leh thuai dawn a ni, a ti bawk.
Prof.F.Lalnunmawia chuan CM zahawm takin kuthnathawktute mi rinawmlo anga a chhuah kha vanduaithlak a tih thu sawiin, Sorkar hian Sailam leh Chamring Sawhthing tharte enhrang loin lei zawh sak ngei se a duh thu a sawi.
Prof.F.Lalnunmawia chuan, “Tun hnaia Reliance Company hnena sawhthing thawn thlak chu sorkar hotute’n a chhia a tam thu an sawi a; chutih laiin heng sawhthing an lakna khaw hnih Chamring leh Sailam a Sawhthing chingtute leh VC te chuan Sawhthing chhia an hralh loh thu an sawi thung; Chief Minister meuhin Assembly House a an khaw hming lama an Sawhthing chhiat thu a sawi leh ‘mi rinawmlo te thlavang i hauh lo ang u’ ti a a sawi chu heng khaw 2 khawtlang hruaitute leh mipuite rilru a na hle a ni” a ti. “An bialtu MLA hlui ka nih angin heng khaw hnih te Sawhthing hi sorkar in en hrang loa lei zawh sak ngei ka phut a ni” a ti.
Prof.F.Lalnunmawia chuan “ZPM sorkar hian thlai thar lei nan Rs Vaibelchhe 310 a ‘DAH’ a. Tunah hian sawhthing hi Rs Vaibelchhe 7 vel man lei tawhin an lei chho tan dawn chauh emaw tih laia kan CM zahawmtak in an harsat thu a sawi ta mai hi a mak hle a ni. Khang thlai thar leina tura an sum ‘DAH’ te kha thil dangah an hmang ta zawk em ni, nge Sawhthing lei theih loh chhuanlam ah kuthnathawktute Sawhthing chu chhia leh hralh tlak lo ah a puh ta mai em ni?” a ti a, “Hmunphiah phei chu lei an tum leh tawhlo emaw tih tur ani” a ti. Hei bakah hian MNF G/S chuan Sawhthing leina tur sum tuak nan Beer leh Wine zawrh an tum ta mai ni a a rin thu a sawi.
Prof.Mawitea chuan “Sorkar in Sawhthing rate Kg 1 Rs 50/- bituk sain kuthnathawktute a chintir a; mahse, kuthnathawktu ten hralh hun an lo beiseiah an leisak leh si lo a, a kahpah in tlem te tein an lei sak a, a chingtute tan a man hla lo hle a ni. Sawhthing hi chawh leh hralh har lutuk chuan alo chawr a, a vuai a, a bûk a zâng duh hle a ni” tiin “Khaw thenkhat ah phei chuan ZPM mi leh sate Sawhthing chauh an lei ni a sawi te a awm mek a, kan sorkar hian mi tumah thliar hrang lovin Zoram puma Sawhthing thar te ti khawtlai lova lei sak thuai thuai turin kan phut a ni” a ti bawk.
