Vawiin khan MPCC Treasurer Dr.Vanlalnghaka Nghaka chuan Aizawl Press Club ah chanchinthar lakhawmtute kawmin, “Kan hriat theuh angin LADC ah Congress leh MNF in sorkar-na siamin tluang taka a kal lai mekin paihtlak thut a ni ta a, sorkar lai ruahmanna thuk tak nen Pu V. Zirsanga chu CEM tura lakluh a ni,” a ti.
Dr. Mala chuan “Special court in Pu Zirsanga hi Corruption Case-ah kum 4 tang tur leh Rs 4 lakhs chawi tura a tih a ni a. Special court (prevention of Corruption Act) judge HTC Lalrinchhana chuan January 19, 2024 khan IPC Section 120B (Criminal conspiracy), 409 (Criminal breach of trust by public servant) leh 420 (cheating) leh Prevention of Corruption Act hnuaia executive member LADC in-charge education a nih laia vbch 1.33 tichingpen a ti a.
“February 7, 2024 a ZPM Thalai Press Statement a Pu V. Zirsanga he corruption case vang vek a, Chief Executive Member nataka an demna thu sawiin ram leh hnam ang pawhin min ti mualpho a, kan ram rorelna sang ber pawh a tizahawm lo in a ti bawrhbangah kan ngai a ni an ti a. Eirukna laka fihlim lo in, ram hruaitu lu ber nihna chelh chhunzawm a tum zel mak an tih thu an sawi ngeia chu ZPM hotu sang te chuan LADC CEM atan an dah leh si a ni.
“Hemi ni chung reng hian lalna leh thuneihna an neih theih nan chuan special court in thiamloh a chantir tawh pawh Lai ram fate lu ber ni tura an la dah zel hian corruption engahmah an ngaihlohzia a tilang chiang hle a ni.
“House zahawm takah House Leader leh CM ni bawkin Lawngtlai West Bialtu Pu C. Ngunlianchunga hnenah anticipatory bail la turin thurawn ka pe a tita mai kha a vanduaithlakin a pawi kan ti hle a ni. Mizoram-a rorelna in kan neih san ber Assembly House zahawmna a tihbawrhban phah hle in kan hria a. Mahni MLA pui thamlo tak leh invauna anga ngaihtheih thil kha thleng tawh lo se kan ti hle a ni.
“Pu C. Ngunlianchunga hian Anticipatory Bail la turin khawi court-ah nge thubuai a neih Mizoram mipui min hrilh turin kan duh hle a ni. Kan CM zahawm tak hian Mizoram mipuite hmaah special court (prevention of corruption Act) in eirukna thubuaiah thiamloh a chantir tawh LADC CEM atan an dahta mai hian Corruption do a hnekin mi corrupt te dinhmun pawimawhah dah pawi an ti lovin corruption hi hmui chauhin an do ta mai em ni kan ti a ni.
“September 13, 2024 khan kan Chief Minister hian Pu V. Zirsanga phone a bia in, Pu Zir, i hova LADC a sorkar-na siam kan duh an tiha kha thudik ngei a ni em? tih hi Mizoram mipui hian kan hre duh bawk a ni.
“CM leh Pu V. Zirsanga 13.09.2024 a an inbiaknaah kan CM hian hengte hi a tiam reng em ni? (Personal thil bakah) – 1) Provincialised School 18 LADC kuta hlan 2) Ngengpui Wildlife Sanctuary leh Phawngpui National Park te LADC kuta hlan 3) Officer Post 20 dawn lakna tur permission pek 4) CEM Bangla tur SASCI hmanga thawh nghal. Heng hi Pu V. Zirsanga’n ni 10.2.2025 khan a ina leng MNF MADC 10 te hnena a sawi nia hriat a ni. Heng hi thudik a ni em tih kan CM zahawm tak hian Mizoram mipuite hmaah puang turin kan ngen a ni.
“ZPM Party manifesto Chapter IX hnuaia point (L) Eirukna tibo tura nasa taka hmasak a ni ang an tih kha an manifesto a an intiamna dangte ang bawkin tihhlawhtlinlohin a awm chho zel dawn niin a lang,” a ti bawk.
