ZPM Media, IT & Publicity Department chuan uluk taka an enkawl lai, ZPM Party Official Facebook Page (Zoram People’s Movement – https://www.facebook.com/ZPMParty) tih chu January ni 16, 2024 chawhnu atang khan Hacker ten an hack sak nia sawiin, Siam that dan zawngin, Facebook (Meta) Headquarters lam te nen pawh in be pawpin theihtawpin a enkawltu ZPM Media, IT & Publicity Department-in hma an la tih an sawi.
ZPM Media, IT & Publicity Department chuan, “Hei mai bakah hian Mizo zingah hetiang lam thiam te pawh rawnin, theihtawpin hma kan la a, kan hmalaknaah hmasawnna leh beiseina tlem tlem kan hmuh chhoh zel avangin lawmawm pawh kan ti a. Amaherawhchu, vanduaithlak takin chutianga beiseina sang tak nena page la let thei tura kan inngaih laiin, kan la let thei ta mai lova. Facebook (Meta) hmunpui lam atanga min hack tu takte paih an nih hnuah, a enkawltute kuta min rawn hlan leh hmain hacker dang rawn tlazep hmanin, tunah hian post an siam tan ta hial a.
“Hetiang a lo nih takah chuan page enkawltu leh kutken tu, Media, IT & Publicity Department, ZPM General Headquarters chuan facebook page chungchanga hma kan lo lak tawh dan te uluk taka thlirlet a kan ngaihtuah hnuah tuna kan page la let tura thil harsatzia te kan ngaihtuahin, loh theih lohna avangin he page awm lai hi ui tak chungin kan thlahliam a tul ta niin kan ngai a. He page hi tihchhiat a nih theihna atana thahnemngai taka min report sak tur leh, followers te pawhin lo unfollow turin kan inngenin in tanpuina kan rawn dil ta ringawt mai a ni.
“He page hi report chhiat a nih veleh, page thar tha leh changtlung, security tha zawk nen thuam chhawpchhuak nghal turin tunah hian kan inpeih tawh a. Page hmasa chhiat rualin page thar kan rawn tichhuak nghal dawn a ni. Page report dan hre lo tan zanin February ni 7, 2024 zan lamah page report dan tur leh page chungchanga kan hmalak tawh dan te sawifiahna rawn neih kan tum dawn nia.
“Tin, page mai bakah hian ZPM Party thuthar leh Sawrkar hmalakna thar ber ber ten mipui hnen a thlen zung zung theih nan party website changtlung tak siam mek a ni bawk a. Media, IT & Publicity Department te in tan kan awm reng a ni,” an ti bawk.
