Vawiin June ni 27,2023 (Thawhlehni) hian Mizo National Youth Front (MNYF) Headquarters, Extended meeting leh infuihtharna hun neih a ni a, he huna thusawitu MNF ṭhalai Vice President Zodinpuia chuan, Mizoram Politics boruak inlumlet dan ngun taka thlirin MNF-in Sawrkarna a chan chhunzawm leh ngei dawn tih a lang chiang ta hle niin a sawi.
MNYF Vice President chuan, Congress leh ZPM chu an hruaitute inkar a nget nasat avangin reilote a tlu mai thei dinhmun a ding mek niin a sawi a, ZPM Party chu a hritlang satliah mai a ni lova, an marphu tawp hun tur mipuiin kan thlir mek a ni, a ti.
Zodinpuia chuan, MNF Sawrkarin covid-19 avangin kum 3 tha vel chauh ram hmasawnna tura hnathawhna hun a nei tih a sawi a, heti chung hian Chief Minister Pu Zoramthanga kaihhruaina hnuaia MNF Sawrkar hmalakna hi Congress Sawrkarin kum 10 chhunga hmasawnna hna a thawh nen a inbuk tawk hial tawh a ni, a ti.
MNYF Vice President chuan, eiruk leh hlemhletna dotu tur Lok Ayukta chu Congress Party khan kum 10 a Sawrkar chhungin a din ngamlo niin a sawi a. Congress Sawrkar khan kum 2016-2017 ah Lok Ayukta din nan nuai 159.34 dah mahse Lok Ayukta dinna tur hian hmalakna an nei ngam lova, kum 2017-2018 pawh Lok Ayukta din nan nuai 159.34 an dah leh a, heti chung hian an din ngam chuang lo ni a sawiin, MNF chuan a Zawrkar tuk mai ah eirukna dotu tur Lok Ayukta hi a din nghal a ni, a ti.
MNF ṭhalai Vice President Zodinpuia chuan, Politics zirtirna dik lo ruihchilh tamna hmunah khawtlang leh kohhran inlungrualna a chhe ṭhin tih sawiin, MNF chu Mizo Nationalism maicham chunga hlan thianghlim tawh, Mizo hnam leh kan kristianna humhim tura din a nih avangin Political Party dangte aiin MNF lakah Mizo mipuite thikthu a chhe bik hle a ni, a ti bawk.
Politics huang aṭanga ram tana ke penna ah rinawmna leh tawrhchhel a pawimawh thu sawiin Pu Zodinpuia chuan, “Keini’n kan tuar, a hlawkna kan ram tan”, tithei tu nih tum zel turin MNF ṭhalai hruaitu kalkhawmte a chah a ni.
Vawiina MNYF Headquarters Extended Meeting chuan Manipur aṭanga kan unau raltlante ei leh bar tur semchhuah nise a ti a, hei bakah hian Zofate’n India Sawrkar lak aṭanga zalenna kan sual laia Hnam Martar-te hriat rengna ‘Martar Day’ lo thleng tur pualin miharsa leh a mamawhte tan Mizoram pum huapa thisen pek runpui neih turin ruahmanna a siam bawk a ni.
Vawiin a MNF ṭhalai Extended meeting hi H.Lalroliana, Treasurer chuan a kaihruai a, F. Vanlalbela Adviser chuan hunserh hmangin zaithiam zai hrang hrangte ngaihthlak a ni.
