ZPM chuan thuchhuah siamin, “Union Home Minister Amit Shah leh Mizoram Chief Minister Pu Lalduhoma hriatpuina hnuaia Assam Rifles ram luah leh, Map-te Mizoram Sawrkar kuta hlan chhawn a nita chu lawmawm kan ti hle a, hemi chungchangah thu dik tâwk lo thehdarh an awm chu pawi kan hlê a ni.
“Dt.15th March 2025 khan Union Home Minister leh Chief Minister Pu Lalduhoma hriatpuina hnuaiah Assam Rifles aiawh Brigadier Girish Upadhya chuan Mizoram Sawrkar aiawh Pu Vanlaldina Pachuau, Commissioner & Secretary, GAD Govt. of Mizoram kutah Assam Rifles ram map-te a hlân chhâwng a, Mizoram a thil thleng chhinchhiah tlâk tak niin kan hria a ni.
“He hun chhinchhiah tlâk tak tihlawhtling tur hian Dt.23rd October 2024 khan GAD enkawltu Chief Minister Pu Lalduhoma leh Assam Rifles hotute chuan Delhi ah inhmuh khawmna neiin, Memorandum of Agreement (MoA) an siam ta a. Mizoram sawrkar aiawhin Pu Vanlaldina Fanai, Commissioner & Secretary GAD leh Lieut.General Vikash Lakhera, Director General Assam Rifles ten signature an pe a, hriatpuitu atan Colonel Navjot Singh Resident Director, Assam Rifles leh Pu Lalrinawma Khiangte, Under Secretary, Govt. of Mizoram te bakah hetih lai a Mizoram MLA awm remchang Pu Lalfamkima Dy. Speaker, Pu Lalmuanpuia Punte Adviser to CM, Pu Jeje Lalpekhlua MLA, Dr. Lorraine Lalpekliana Chinzah MLA, Dr. K Beichhua MLA, Pu Rashid Mohan Chakma MLA leh Pi Prova Chakma MLA ten an hriatpui bawk a ni. MoA hi 1st April 2025 a hman tan tur a ni a, Union Home Minister Amit Shah te nen ruahmanna thui tak siam a nih hnuah Chief Minister Pu Lalduhoma pawhin Mizoram a lo pan leh ta a ni.
“Chief Minister Pu Lalduhoma kaihhruai GAD Govt of Mizoram leh Assam Rifles ten Memorandum of Agreement a effective date an siam, 1st April 2025 hma ngei a Union Home Minister Amit Shah ngeiin Assam Rifles Ram inhlanna hun a rawn ti hlawhtling leh ta zel hian, ZPM Sawrkar rintlak zia pawh a ti lang chiang hle a ni.
Assam Rifles ram luah sawn chhuak tur hian kum 38 zet hmalakna a lo awm tawh a, tuna hlawhtlinna leh hmasawnna kan chan mek hi Party hrang hrang, Sawrkar tawh te hmalakna leh NGO, Kohhran leh Zoram mipui ten inlungrual taka kê kan pên hona rah a ni tih ZPM Thalai Headquarters chuan a hria a. Tuna hlawhtlinna kan chan chhoh mek hi Zoram mipuite hlawhtlinna ah kan ngai a ni.
“Hetih rual hian tun hnaiah MNF Party Workers ten Assam Rifles Ram inhlanchhawn chungchangah mipui, kohhran, NGO, Party Sawrkar mek leh sawrkar tawhte hmalakna sawi bovin an mahni party bil hmalakna kal zel hlawhtlinna niin media platform hrang hrangah an theh darh mek a, MNF te hi an in fak duh luatah khaw êng an hmu zo tawh lo niin ZPM Thalai Headquarters chuan a ngai a, nikum October 2024 ah MNF MLA ten Pu Lalduhoma kaihhruaina a GAD leh Assam Rifles ten MoA an sign a ni tih an hriatpui hnuah pawh MNF Party Workers ten thudik tâwk lo an la vawrh darh duh zêl hian MNF Party a ti hmingchhe hlê ah ZPM thalai chuan angai a ni,” an ti.
