ZPM hruaitute chuan vawiin khan kumin chhunga cheng nuai 19.72 senga cheithat Tamdil a hmunah tlawhin thil awmdan an enfiah. ZPM hruaitute Pu Lalthansanga (Chatea) Ex-MLA, Vice President chuan a ho a ni.
Tamdil hi kumin 2022 chhung hian cheng nuai 19.72 zet sengin tum hnih lai cheithat (renovate) ni tawh mah se, inkalpawhna step/ approach alleyway te a khi/khawk nasa em em a. Boat hman theih pakhat mah awm lovin a chhe fai vek bawk a. Cottage/ khualbuk pakhat hluihlawn niin pakhat phei chu balcony a khi nasain hlauhawm hle bawk. Hei bakah hian Cafeteria/ Hall darthlalang keh te pawh a la awm a ni.
Lalthansanga (Chatea) Ex-MLA, Vice President chuan, “He hmun tlawhtu hnam dang pakhatin social media kaltanga zualko a, he hmuna hnathawk bân a nih khan a aiawh turin chawkidar dah a ni a. Khualchhawn dah tel a nih loh avangin hnamdang khualzin ten tawng chungchangah harsatna an tawk tih a takin kan han hmu a. Cheng nuai 19.72 zet senga cheithat a ni chung leh ngam zawngte laka kutthlak a nih hnuah pawh harsatna sutkian a la ni lo fo mai hi ZPM chuan pawi kan tiin mak kan ti hle a ni,” a ti.
