Vawiin 20th March, 2023 Monday hian BJP Mizoram chuan Karthar inhlanna hun BJP State Office ah neiin, VL Awia, State Secretary-in inkhawm a kaihruai a, Vanlalhmuaka, State President-in thusawina hun a nei bawk.
Vanlalhmuaka chuan, “Mizoram ṭhalai tam tak te chuan thil tak tak an duh avangin BJP Sorkar hi a ṭul tawh hle tih hi an hria a, hei mai nilovin thingtlangah pawh BJP hruaitu hrang hrang te zinna report kan en hian, Mipui te’n beiseina sang tak an nei a ni tih hi a hriat theih a ni. MNF leh Congress ah beisei a bo tawh a, ZPM hian nasa takin hma an la chung hian, Central an zawm lohna hi beiseina tak tak an neih theih lohna pakhat a ni tih a hriat theih a ni,” a ti.
Pu Hmuaka chuan, “NE State-te chuan BJP Sorkarna term hnihna tur an hmang mek a, Term khat chhung lek pawhin an State ah nasa takin Development a thleng a, Mizoram ah pawh BJP Sorkar nei ve ngat ila chuan ṭhenawm State-te aia nasa zawk pawh hian Development hi kawng hrang hrangin a thleng thei a, Central hian chutiang ti turin min pui thei reng a ni tih hi vawiin ah hian kan hriat a ngai a ni a ti. Chuvangin Development tak tak a lo thlenna turin BJP Sorkar ah lo chuan kawng a awm lo a ni tih hi vawiin hian Mizoram mipuite hian kan hriat a pawimawhin hei hi thu dik tak a ni tih ka sawi duh bawk a ni,” a ti.
Pu Hmuaka chuan sawi chhunzawmin, “BJP kan Sorkar chuan Sorkar ah Krista Lalna kan thlen tir anga chumi aṭang chuan Ringlo mi kan tih te khuan kan Sorkar kaltlanga Krista an hriata, thusawi mai ni lova, kan nun leh kan thil tih ah Krista an hmuh thei dawn a ni. Central hruaitu te’n min chah nasat thin chu, BJP a ram rawngbawl tur chuan kan hnamah leh Sakhua ah kan rinawm tur ani an ti thin. Vawiina kan Sorkar hrawn tawh te aṭang chuan ‘Milem bia’ kan tihte khuan kan rinawm loh avangin kan sakhuana thlengin fak ahlawh loh phah a, keimahni avanga Pathian hming sawichhiatna remchang an hmuh phah ṭhin hi BJP kan Sorkar a nih chuan tih bo a ni tawh dawn a ni,” a ti bawk.
