Vawiin hian Saitual District aṭanga MNF VC tling tharte leh term 7 VC tling tawhte chawimawina hun Zawlbuk, Keifang Venghlun-ah neih a ni a. He hun hi Dr R Lalthangliana, Senior Vice President chuan khuallian niin a hmanpui.
He hunah hian Dr R Lalthangliana chuan thusawiin, “Harh thar lehna MNF party-ah a thleng mek a, LC leh VC ruling-in zaa sawmsarih vel an la ṭhin ang kha a thleng lo a. ZPM hi an sorkar chak ber lai pawhin MNF-in kan la tam hle a, a lawmawm hle a ni. Tun LC leh VC inthlana Ruling hniam taka an awm hi a la thleng ngai lo a ni,” a ti a. MNF LC leh VC te chu danglam bik, ṭha bik, entawntlak ni turin a chah bawk.
Dr Thangtea chuan, “MNF leh Congress kan lo sorkar tawh a, mipuiin hetiang reng renga sorkar an nin hma hi a la awm ngai lo. Thil tam tak an tiam a, driver pension scheme thlengin an tiam a. Engkim mai an tiam a, an sorkar hma aṭangin mumang ramin an kal a. Thlai thar kan lei ang, motor pakhat chauh kan kawl ang, an tia, an thusawiin na takin a vaw let mek a ni. An kal dan en hian ZPM hian an daih rei ka ring lo,” a ti.
Dr Thangtea chuan, “MNF chu sorkar leh turin a inbuatsaih leh mek a. Policy & Programme Committee din a ni a, a ki dang deuhin ram mipui zawh tur leh ṭhalaite dinchan theihna tur hawi zawng, thingtlang loneitute dinchhuahna tur kan duang dawn. A ki danglamin Policy tihhlawhtlin ngei tur kan duang dawn a ni,” a ti.
MNF Senior Vice President chuan, “Ramri buai, vawk pul hri leng, lirnghing, kangmei leh Covid hripui kan tawng a. Khati khawpa buaina nasa kan tawk chung khan District thar pathum kan puan te ṭha takin kan function tir thei a. Hei bakah hian hmasawnna kawng hrang hrangin nasa takin kan kalpui thei a ni,” a ti. “MNF hma lam a eng hle a, kan sorkar leh ngei ang tih hi ka ring a ni,” a ti bawk.
Pu Lalrinenga Sailo, MNF Adviser leh Aizawl Mayor ni bawk pawhin thu a sawi a, “A tih a tih ni lo, a sawia sawi ṭhin sorkar kan enchhin mek a, a vanduaithlak hle. Kum 2/3-ah ZPM thlang tlingtu Zoram mipuite an inchhir ang, kan tih kha a lo ni lo, tunah hian an inchhir der tawh a ni,” a ti a. “MNF meichher chhitu MNF LC leh VC-a tling thar zawng zawngte chungah lawmthu ka sawi bawk a ni,” a ti.
“Kuthnathawktute awhnan thang an kam a, chu an thangkamah chuan anmahni an awk mek a ni. Sawhthing leh hmunphiah chungchangah pawh he sorkar hi an buai hle a, a mualpho mek a ni. Universal Heath Care chungchangah pawh sorkar hnathawkin an pawm hlei thei lo a, sorkar a buai ru hle a ni,” AMC Mayor chuan a ti bawk.
