Dated Aizawl, 31st January, 2024: Vawiin January ni 31, 2024 (Nilaini) hian ZPM General Headquarters Executive Meeting, Republic Veng Community Hall-ah neih a ni. He hun hi Lalliansawta, President-in a kaihruai a, Rev. Dr.K. Thanzauva, Vice President in hunserh hmangin Pathian hnenah meeting a hlan.
Vawiin meeting hian party hruaitu thlan hun tur chungchang a ngaihtuah a. ZPM General Headquarters inthlan hun atan, February ni 15, 2024 (Ningani) ruat a ni. He hunah hian Chief Minister, Ministers leh MLA te nen member 317 an kal a ni.
Chief Minister leh Finance changtu ni bawk Lalduhoma chuan, tun hnaia sum harsatna chungchanga thudik tawk lo darh chu pawi a tih thu sawiin, treasury khar a nih loh thu leh sawrkar hmasa atang sum chet vel dan fel lo inkhaidiat chho nghawng avanga sawrkar sum harsatna thlen chhoh dan chungchang a sawifiah a, sum harsatna chingfel tura theihtawp an chhuah mek thu leh, zawi zawi a insiamthat chhoh zel theih a beisei thu a sawi.
He meeting hian, hun rei lote chhunga Pu Lalduhoma kaihhruai Mizoram sawrkar kal dan lungawithlak an tih thu leh, an kal leh zelna turah duhsakna a hlan a ni.
