Vawiin ni 20, September, 2024 hian Congress Party chuan Congress Bhavan-ah ‘Friday Political Session’ an hmang a. He hunah hian Pu Joseph Lalhimpuia, General Secretary, MPCC, PAC Member ni bawk chuan thusawi in, “Mipuite thiam taka thlema sorkarna siamtu ZPM chu an sawi ang an lo ni lo tih a lang mek a, mipuite hi min lo bawl mai mai a ni.
“ZPM ten thiam taka thil tha tinreng, an tih theihloh tur pawh intiamin an inzuar a, mizo mipuiin beiseina sang tak nen hneh takin kan thlang tling anih kha. Amaherawhchu, thla riat emaw chauh sawrkarna anla kalpui chungin Thalai, Kuthnathawk leh ran vulhtute, sawrkar hnathawk thlengin an beidawng mek a ni. Opposition annih laiin mipui tih lunglen leh beiseina neihtir an thiam a, mipui an ti lungleng a, an sawrkar hnuah engmah an tiam ang an hlen thei si lova, mipui mai bakah an mahni zingah pawh an beisei an phak leh loh vanga beidawng an tam tawh hle ani. Chuti chung chuan sawisel ngawt aiin an dinhmun enfiah a mipui hnen a thudik tarlan hi a thain ka hria a, vawiinah hian bukna lung tlem kan khai ve dawn a, sorkar kal lai mek kan X-ray ve dawn a ni.
“Mizoram a la awm ngailo, Council of Minister meeting chu boruak lian tak hnuaiah 2nd July 2024 khan Lungleiah neih anih thu sawiin. Meeting zawh chuan ei in man senso cheng nuai 321565 /- lai ba thinna Aizawlah thawn phei an ngai phawt a. Chu mai ala nilo, April ni 18, 2023 a lakluh ZPM councilor ten thla 16 an hmang ve chauh chungin an lawmman chu za zelah 106 % laiin an tipung hem mai. Tichuan municipal sum tuak nan parking fees an ti to ta vak a, Lunglei mipui an phun ta sup sup mai a ni. Council of Minister Agenda 14 atangin 6 an pass a, 6 zinga 2 hi mipui phurrit siamtu ani. Petrol leh Diesel man tih san vakna leh LMC lawmman reilote chhung a 106 % a tihpunna ani. He meeting Lunglei DC leiba cheng nuai 321565/- bakah HPC sum nuai 116800 /- hman ani a, Aizawl atanga official, Chief Minister atanga peon thlengin kal mi 134 an kal a ni. He meeting a kal te thlenna leh TA/DA senso nuai tam tak ala awm cheu bawk. ZPM LMC hlawh punna tur a meeting atang a ni sarih chhung, ni hnih holiday awm chung a order chhuak hman ang hian CSS leh thildang, kawngchhia ahte hian action la hma se a va lawmawm dawn em aw! Hlawhpung hma leh pung tam, order chhuak hma record ani thei hial ang.
“Khaikhin tur remchang tak awm chu Pu Hawla kaihhruai congress sawrkar ah khan thla nga na ah Lunglei High Powered Committee chu Baptist Hqrts ah neih ani a, thil tam tak zingah Lunglei Convention Centre, nuai 1877.40 seng a sak a rel a, vawiin thlengin Lunglei mipuiin an hmang tangkai em em a ni.
“MNF sawrkar a Chief Minister leh Minister pakhat in an hman thiam leh larpui em em, sawi hlawh bawk tak PMJVK ah hian sum atam hle mai a, Central share ringawt pawh kum 2023- 2024 atan ni 31, December 2023 khan nuai 1000 minlo pe tawh a, kum 2024- 2025 atan September ni 2 , 2024 khan nuai 3500 min pe leh bawk. Pradhan Mantri Jan Vikas Karyakram ( PMJVK ) hi District Council and Minority Department hnuai Pu C. Lalsawivunga enkawl thin ani. Mahse Sept ni 3, Central sawrkarin pawisa a rawn sanction tuk chiah khan Chief Minister enkawl mek Planning & Programme Implementation Department hnuaiah an dah ta daih mai a ni. ZPM manifesto, Sustainable Development & Reform Policy (SDRP), Kalphung thar, Mipui sawrkar Chapter 9 na, Administrative Reforms tih ah Chief Minister chuan Council of Minister te tha tak a a vil theih nan, ‘Works Department bik enkawl anei lo ang’ ti mahse, Sum tamna Department chu a enkawl belh zel tih a chiang hle a ni.
“ZPM sorkar hnuaiah ran vulhtuten duhsak an hlawh lo hle. ‘Midang aiin kan tha bik, kan that bik loh chuan enge kan sawrkar a tulna awm’ ti mahse, ZPM sawrkarah hian kumin Jan atanga 19 September thleng khan ASF avangin Sawrkar record ah Vawk thi zat chu 12756 a ni. Vawk suat zat 21871 a ni a, a vaiin vawk 34627 an thi tawh a ni. An la thih belh zel bawk, a pawiin vawk vulh tute an khawngaihthlak tak zet ani. Hri avang a Vawk thi hi chawh rualin inches 35 lo ni ta se, Market rate anga chhutin cheng 1,038,810,000 /- lai a tling a, in report lo hi an tam hle ang tih hriat sa ani. A zahve lo tling ta se nuai sing 2 chuang kan chan tihna ani. Hei hi Mizoram chhung a vawk, mizote vulh ani a, kan economy a nghawng nasat dan tur chu rapthlak tak ani. Heti chung hian ZPM sawrkar, mi dangte aia tha a insawi hian vawkvulhtute tanpui dan tur mutmawh hnarmawhah anla nei chuang miahlo nia.. Vawk vulh tute trap thawm hian a la beng harh zolo pawh ani mahna.
“ZPM sorkar chhungah inthliar hranna a awm em ni aw tih theih a ni. Kum tirah an policy lian zinga mi hmunphiah leina an DAH a, mahse an kalpui theilo, a enkawltu Minister chu Pu Chatea PC party thin a ni. Vawk sing tel a pul a, chhungkaw tam tak an rum vawng vawng, a enkawltu chu Pu C. Lalsawivunga, PC party thin a ni, kum tam tak chhungin kan kawng chhiat ber ani hial ang tih tur kan hmachhawn mek a, PWD enkawltu chu Pu Vanlalhlana ani, ani pawh hi PC party thin bawk ani a, CM emaw, Adviser i/c Finance emaw an lan hma chu kawngchhiat chungchangah a ngawi thei hle. Assembly ah leh budgetah Minister thenkhat chanpual chu ba rulhna ani emaw, project thar a ni emaw tarlan anih fo lai a, PC Party ni thin MLA tawnhriat ngah takte an chanpual theihtawp an chhuah chung pawh a mutan a awm tlat thin hi a pawi tak zet a, khua leh tui te tan harsatna nasa tak a awm thin avangin sawrkar laiah hian in enhranna awm lo a, an intiam ang ngeia ram mipuite tan theihtawp chhuah turin ZPM sawrkar ka ngen ani.” a ti.