Vawiin Dt 30.5.2023 Thawhlehni hian Zothantluanga (Pu Valtea) Aizawl East – I bialtu MLA, Vice Chairman, Man Power Development Board chuan Sairang khawtlang hnenah Scuba/ Diving equipment (tui chhung luhna) hmanrua set hnih a hlan.
Zothantluanga MLA chuan thusawiin, “Kan sawrkar leh VC-te nena kan hmalakna a zarah hetiang hmanraw changkang leh tha, man to tak mai kan nei thei ta hi Aizawl mipui mai bakah Zoram mipui tan chanchin lawmawm tak a ni. Sairang khawtlang tan erawh intlawmngaih chhuahna kawnga hmanraw tha zawk kan inpek a ni mai a. Heng hmanrua tangkaipui tur tak zawk chu Zoram mipuite kan ni. Zoram hmun hrang hranga tuitla ruang zawn ngai an awmin Mizo tak leh tlawmngai takin in thawk chhuak thin a, intlawmngaihna te hi a chhuanawm tak zet a ni. In tlawmngaihna leh in inpekna tha tichak tura hmanrua kan in pe thei hi lawmawm ka ti hle mai,” a ti.
He hunah hian Sairang khawtlang hruaitu kalkhawmte pawhin thusawiin, DC leh Governor thleng te pawn kan lo dil thin, pawimawh leh tul min tihpui viau chunga a tak taka a hlawhtlinna kan hmuh ngai loh kan hmu ta a. Kan bialtu MLA Pu Valtea’n kan mamawh leh kan harsa kan thlen apiang mai min tihsak thei zel mai hi vannnei kan in ti a, hetiang a khawtlang min hmangaih puitu MLA kan nei hi kan lawm tak zet zet a ni, an ti.
Zothantluanga MLA hian Sairang khawtlang ten an awh em em football field tha mumal an la neih ngai loh a laihsak chu a tlawh nghal a. “Rei lo teah field puitling tha tak an nei vat dawn a ni,” a ti. Tin a bial chhung a Class – X leh Class – XII top ten a langte lawmpuina Laptop a hlan bawk a ni.
