VL Krosshnehzova, General Secretary, MNF General Secretary chuan vawiin khan Aizawl Press club-ah press conference neii, “Zofate tan Pa nih tling, innghah ngamna Chier Minister kan kan nei hi kan chhuang hle a ni,” a ti.
“Manipur buaina kal zelah August ni 3, 2023 khan Indegenous Tribal Leaders’ Forum (ITLF) buatsaihin Hnam tana Martar te vuina hun chu Haolai Khopi, S. Bualjang/Torbung hmunah urhsun taka hman tum a ni a. Hemi avang hian Zofate leh Meitei inkarah a ruka inep tawnna boruak lian tak awmin, an karah sipai an awm bawk a; nunna tam tak chan belh thei dinhmunah an ding a, silai pawh a puak hman hial a ni. Ministry of Home Affairs pawhin boruak thalo zawk a thleng thei tih hriain lam-kal a tir nghal a. Martar-te vuina hun hman tum chungchangah Central Sorkar aiawh leh Indegenous Tribal Leaders’ Forum aiawh te’n August ni 2, 2023 khan tum hnih (2) zet meeting neiin, Central Sorkar aiawhte hian mitthite vuina hun sawn turin rawn ngen mahse an ngenna hi tihhlawhtlin sak nghal a ni chuang lo a ni,” a ti bawk.
VL Kroshnehzova chuan, “Hetianga boruak rit ru tak hnuaiah hian Union Home Minister Pu Amit Shah ngenna angin Manipur leh Mizoram hnaiha awm Assam Chief Minister Himanta Biswa Sarma chuan August ni 2, 2023 zan dar 10:00 khan Mizoram Chief Minister Pu Zoramthanga chu telephone hmanga rawn biain, ITLF hruaitute hnenah mitthite vui hun sawn tura ngenna thlen turin tih tak zetin a rawn ngen a. Chief Minister Pu Zoramthanga pawhin uluk takin ngaihtuahna a seng zui a, CYMA President Pu R. Lalngheta chu ITLF hruaitute dawr dan tur chungchanga ruahmanna a siampui hnuah August ni 2, 2023; zan dar 11:00 rik hma deuh khan Manipur Zofa Hnam hruaitute chu telephone hmanga biain Central lam ngenna hi ngaihthlaksak phawt a tha ang e, tiin rawtna a zuk thlen ta a. Central Sorkar hi Manipur buaina chungchanga thu thlente ngaihtuah saktu tur leh solution tha zawk an beisei mekte ngaihtuah saktu tur an nih avangin an duh ang tihsak phawt a him rih a rin thu Manipur Zofa hruaitute hi a hrilh a. An thu leh hla ngaichanga ngaihvenin Pu Zoramthanga, Chief Minister hi a tlaivar thak nghe nghe a ni.
“He thu hi August ni 3, 2023 zing dar 3:00 thleng Manipur Zofa hruaitu te’n an sawiho hnuah, ‘Pu Zoramthanga, Zofate tana ding ngam leh min duhsak em em tu, ‘Pa’ ber dinhmuna kan neihin min ngenna hi a zahawm e,’ tiin mitthite vui hun chu sawn an remti ta a. Mitthi vui hun sawn hi remti mahse remruatna fel tak nen Peace Ground, Lamka-ah hnam tana Martar-te pualin hun ropui tak an buatsaih rih ta thung a ni. ITLF te chuan Union Home Minister hnenah Assam Rifles of Lamka, Hqrs. 27 Sector kaltlangin an demand point panga te nen ni nga (5) chhung nghah leh phawt an remtih thu lehkha an thawn zui bawk.
“Buaina nasa zawk thleng thei reng leh nunna tam tak chan belh theihna boruak awm karah Mizoram Chief Minister Pu Zoramthanga ngenna anga ITLF te’n Central lam ngenna an remtih tak avang hian Union Home Ministry lam pawh an lawm hle a. He thu hi Assam Chief Minister Himanta Biswa Sarma pawhin a hriat veleh, August ni 3, 2023 zing dar 8:30 khan Pu Zoramthanga, Mizoram Chief Minister chu telephone-a rawn biain a hranpa ngatin lawmthu a rawn hrilh leh bawk a ni.
“Mizoram mai ni lo, khawvel hmun hrang hranga Zofate tana ding tlat thin, Manipur Zofa Hnam Hruaitute pawhin ‘Pa’ nih tlinga an ngaih, a thurawn leh ngenna te pawm tlaka an ngaih Chief Minister Pu Zoramthanga kan nei hi MNF Party chuan chhuanawm kan ti hle a. Hnam tana ding ngam; ram, hnam leh sakhaw thilah chuan a dinna sawh sawn mai mai ngai lo, ram leh hnam thatna tura principle nghet tak neitu Chief Minister kan nei hi lawmawm kan tiin kan chhuang tak zet a ni.
“Mizo sorkar chuan Manipur unau raltlante a buaipui zui zel a. Dt 3.8.2023 tlai lam dar 5 thleng khan Mizoramah Manipur kan unau raltlan hi 12,632 an awm mek a, District hrang hrang 11-ah an awm mek a ni.
“An mahni chhawmdawl kawngah YMA, VC/LC, khawtlang, pawl leh mimal hrang hrangin theih tawp kan chhuah mek zel a. Mizoram sorkar pawhin a theih tawp a chhuah mek zel a, Manipur raltlan leh Manipur Zofate pualin Dt 8.5.2023 atanga Dt 4.8.2023 thleng hian buhfai quital 4983 sem chhuah a ni tawh a ni.
“An pual hian Mizoram sorkar chuan Central-ah fund vaibelchhe 10 a dil a, tun thleng hian hmuh a la ni lo. Mizoram sorkar chuan sum indaih lohna karah theih tawp chhuahin kan unaute chhawmdawlna sum leh pai thahnem tak a seng mek zel a ni. An hun tawn avanga rilru lama harsatna tawk awm theih a nih avangin raltlan camp hrang hrangah sorkar-in Covid 19 do nana a din Psychological and Social Guidance team chuan hma lain vawi tam tak camp hrang hrang kalin an rilru lam hriselna tur atan hmalak bawk a ni.
Manipur unaute’n separate administration an phut pawh MNF chuan kan thlawp tih kan puang nawn leh a, India sorkar hian a rang lamin ruahmanna siam thuai turin kan phut bawk a ni.
“Pathianin ram min pek theuha tunhnaia Zofate min khawih chet dan hi a mak hle a, Zofate hian bung thar kan kai dawn nite pawhin a lang a ni. Chutiang a nih mek laia mahni hmazawn theuhah kan unau raltlante tana Zofa hmun hrang hranga awmte inpekna hi MNF chuan lawmawm a ti tak zet a, Mizo hnam tana ding Mizo nationalist party MNF chuan lawmthu a sawi a, hemi kawnga Mizoram Chief Minister hmalakna te hi a ropui kan tiin kan chhuang tak zet a. Zoram leh Zofate kan insingsak mek lai hian hnam aiawha ding chhunzawm zel turin Pu Zoramthanga hi a tha ber a, Pathian khawngaihna leh mipuite duhsakna changin kan hma maia inthlan lo awm turah hian Chief Minister a nih leh ngei kan ring tlat bawk a ni,” a ti bawk.
