Mizo Students Union (MSU) huaihawtin College hrang hranga zirlai ten admission leh tuition fee sawrkar a chhunluh an duh loh lantirin ‘College Hmasawnna Hnatlang’an nei a, an thilphut hi Chief Minister Zoramthanga’n a pawmpui hnuah tlai dar 5 vel khan an tin.
Vawiina Vanapa Hall kawt a zirlaite punkhawmnaah MSU hruaitute chuan zirlaiten admission fee leh tuition fee cheng 1,320 an chawi thin chu sawrkarah lut lo a, college tih hmasawnna atan hman an phut tih an sawi a. Kum 2013 atanga an lo nawr tawh thu leh sawrkarin a ngai pawimawh lo nia an hriat avangin hnatlang huaihawt annih thu an sawi a ni.
Zirlaiten admission fee leh tution fee sawrkar a chhunluh an phalloh nachhan sawiin MSU hruaitute chuan sorkar laipui enkawl University te chuan anmahni hmasawnnan te, zirtirtu indaihlo rawih belhna atan te, college building sakna atan leh bungraw leina atan an hmang tih an sawi a, hetiang atana hman ve an duh tih an sawi bawk.
MSU hruaitute tarlan danin, kumin a zirlaiten admission leh tuition fee sawrkar a an chawi zat hi cheng vaibelchhe 2.72 a ni a. Vanapa Hall kawta hun an hman zawh hnuah Chief Minister Pu Zoramthanga hmuh tumin CM Bangla an pan leh a, hetah hian Chief Minister chuan an thil phut a pawmpui tih a sawi hnuah an tin a ni.
