Aizawl, the 26th February, 2024 : Vawiin khan ZPM chhung inkhawmah JK Dawngzuala, ZIDCO Chairman chuan thu sawiin, “Tunah hian ZIDCO chuan Year of Reconstruction puangin sawrkar sum (mipui sum) a leiba min rulh sakna hi do let thei ngei turin kan inbuatsaih a. Eng hna pawh thawk thei turin ZIDCO hian theihna a nei a, hman tangkai a ni ngai lo zawk. ZPM Policy – Hand Holding hi ZIDCO chuan tangkai taka kalpui kan tum a ni,” a ti.
ZIDCO Chairman chuan, “ZIDCO hi February 27, 1978 khan Mizoram State Industrial Development Corporation (MSIDC) tia din a ni a; kum 1985 khan Zoram Industrial Development Corporation Ltd. tih niin kum 2020 khan Zoram Infrastructure & Industrial Development Corporation Ltd. tih a lo ni ta a, a hnathawh ber chu Industrial Financing a ni. Kum 1997-2003 chhung khan loan rulh that loh Rs.15 crore a awm a, tunah hian Rs.8.10 crore rulh tur awm mek niin Interest & penalties hi Rs. 12.23 crore awmin heng zawng zawng belhkhawm chu Rs.20.33 crore, a ni. NMDFC hian tum khata kan rulh vek theih chuan Rs.12.23 crore min ngaidam thei a, Mizoram sorkar-in hei a ngaihtuah mek a ni. HUDCO Housing loan 2006-ah Rs.10 crore leh Motor Parking Loan atan Rs.2.27 crore, a vaiin Rs.12.27 crore nen Rs. 15.00 crore pek tawh a ni a, heti zat pek a ni tawh chungin Interest/penalties avangin namen lova tam HUDCO-ah bat a la ni. Debt Recovery Tribunal, Guwahati-ah HUDCO hi khin niin Settlement package dil a ni a, Rs.20.44 crore a rulh zawh phalsak kan ni. Mizoram sawrkarin min rulhsak dan tur chu Interest free loan (kum 10 chhunga rulh let tur)-ah Rs. 10.22 crore leh Grant to ZIDCO-ah Rs. 10.22 crore a ni a, sawrkarin Rs. 5.11 crore pe tawhin Rs. 15.33 crore chu May/June chhunga pek tum a ni,” a ti.
JK Dawngzuala chuan, “Tunah hian hna kal lai pahnih JNV, Siaha-ah Rs.33.54 crore (March 2024-a zawh hman tum) leh IGC Upgradation (SASCI)-ah Rs. 13.42 crore a awm mek a, sum hloh tling khawm (Accumulated loss) Rs.8.45 crore a awm. ZIDCO-ah hian hna (Post) 81 awmin thawktu erawh mi 29 an awm mek a, Sorkar grant hmangin thawktu hlawh leh mamawhte pek a ni. Mizote hna thawh kawngah kan harh thar a ngai a, dik tak leh rinawm taka thawk tura rilru leh thinlung siam thar kan mamawh. Hotu lu ber atanga a hniam ber thlengin mawhphurhna hlen tur kan nei theuh a, kan ram siamtha tur hian kan hmazawn theuhah taimakna leh rinawmna vawng nung chungin hma thar kan lak mawlh mawlh a ngai a, ZIDCO kaltlangin Hand Holding Policy kan neih mek hi hlawhtling taka kalpui kan tum a ni,” a ti bawk.
