Vawiin khan PC Vanlalruata, ZPM Secretary General chuan Aizawl Press Club-ah chanchinthar lakhawmtute kawmin, “Mizoram Chief Minister bial Zemabawk Local Council-ah MNF Member 4, Congress Member 2 leh ZPM Member 1 an awm a. MNF Member 1 leh Congress Member 1-in ZPM an zawm tak avangin ZPM-in Member 3, MNF in Member 3 leh Congress-in Member 1 an nei ta a. Sawrkar siam thei an awm tak loh avangin Sub-rule (1) of Rule 24 of Mizoram Municipalities Ward Committee and Local Council) Rules 2010 (as amended in 2020) sawi angin Zemabawk Local Council chu August ni 16, 2022-ah thiah (dissolved) a ni,” a ti.
PC Vanlalruata chuan, “Sub-rule (2) of Rule 24 of Mizoram Municipalities Rules 2010-in a sawi angin Administrator atan Local Council huam chhunga mi chal lang (Prominent Citizen) dah tur a nih laiin Local Council inthlana MNF Ticket a tling zo lo Pu Kapsanga chu Administrator atan dah a ni mauh mai a. Sub-rule (2) of Rule 24-in a sawi ang bawkin Local Council thiah (dissolved) anih chuan thiah a nih atanga ni sawmruk chhungin a thara inthlanna buatsaih leh tur a ni a. Mahse, Zemabawk Local Council chu August ni 16, 2022-ah thiah (dissolved) a ni a. Ni 60 a ral hnu October ni 16/2022 thlengin inthlang tura hmalakna pakhatmah hmuh tur a awm lo,” a ti.
“Mizoram State Election Commission-ah General Administration Department (GAD) atangin inthlan buatsaih a ngaih thu engmah hriattirna ala awm lo niin kan hria a, a pawi kan ti hle a. Chief Minister bial chhunga Vote tamna ber Zemabawk Local Council inthlan a hun taka buatsaih anih loh chhan a mawhphurtu, a kaikuang chu GAD changtu Chief Minister hi a ni. Engvang nge a bial chhunga Local Council inthlan a ngam tak loh tih hi ZPM chuan kan zawt a, Zemabawk mipui ten enkawltu neilo a hei chen an awm hi a pawi kan tiin, kan lainat takzet a. Local Council inthlan hi a ranglama buatsaih thuai turin ZPM chuan kan phut a ni.
“The Mizoram Municipalities (Ward Committee and Local Council/Rules 2010 siam chhuaktu MNF sorkar chuan an mahni dan siam ngei chu khaw eng pawh zah map lova, a bawhchhia tu-ah an tang hi kan dem takzet bawk a.
Mizoram sorkar chuan Lunglei Municipal Council dinin kumin chhung ngeia inthlanna neih a ni ang tiin a changtu Dy Chief Minister-in vawihnih (2) ngawt mipui hmaah a puang tawh a. Chuvangin ZPM chuan LMC Election Committee dinin inbuatsaihna thui tak a kalpui tawh a. Pathian leh mipui zarah sorkarna lak ngei pawh kanin beisei hle. Sorkar-in LMC Electoral Roll pawh ni 14, October 2022-ah a ti chhuak tawh a. Amaherawhchu Lunglei kawngpui a chhiat lutuk avanga Sub-Hqrs YMA-in ni 18, October 2022 a nawrhna (no-vehicle day) an hman tak si avangin LMC inthlan buatsaih chu an ngam leh dawn lo niin kan hria a, a pawi kan ti takzet a ni,” a ti bawk.
