Vawiin August 31, 2022 hian MZP Headquarters, Zawlnuam chuan zirlai Pass tharte chawimawina hun, Multipurpose Hall, Zawlnuam College-ah an hmang a. Hachhek bialtu MLA Pu Lalrindika Ralte chu khuallian a ni.
He hunah hian Pu Lalrindika Ralte, MLA chuan zirlaite fuihna thu sawiin, “He leiah hian kan vul nawn dawn lo a, vawi hnih kan piang dawn hek lo. Chuvangin khawvel hi kan theihna sang ber kan pe tur a ni. Pathian hian zalen taka hun kan hman hi a remti a, mahse, Bible-in a sawi angin rorel sakin kan la awm dawn tih kan hriat reng a ngai a ni,” a ti.
“Mihring ti hlutu, hman tlaka min siamtu chu zirna leh thiamna hi a ni. Taksa hian hlutna a nei tak tak lo a, mi chu eng anga lian leh sek pawh nise hriatna leh thiamna a neih loh chuan hman tlak a ni chuang lo. Tin, thiamna chu mahni hlawkna tur ringawt a ni tur a ni lo a, mahni in chinfel theih ringawt lam a ni hek lo, mahni pawh in chingfel theilo te pawhin an chhawr theih tur thiamna kan pawchhuak ngei ngei tur a ni. Midangte tana malsawmna kan nih let theihna atana thiamna pawchhuak turin ka ngen che u a ni. Chapona hi hmasawnna daltu a ni. Tuna i dinhmun mek kha i chapopui a nih chuan tuna i dinhmunah khan i lungawi tawk tihna a kawk tel a, chu chuan hmasawnna tur a dal a ni tih i hria ang u. Tin, khawvelah hian chapopui tlak khawpa dinhmun sang leh dinhmun tha hi a awm tak tak lo tih kan hre tur a ni. Midang aia thatna bik kan nei a nih chuan chapopui lovin, chutiang min petu Pathian chawimawi nan hman zawk tur a ni” a ti bawk.
Thiamna hmang tangkai turin hna lakna reng reng a fair tur a ni tih sawiin, “Thiamna hi a nih dan ang taka hman tangkai a nih theih nan hnalakna reng reng a fair tur a ni. Kan ram leh hnam leh thalaite nun tihchhiat vek pawh pawiti lo khawpa mahni hmasial kan awm thin hi a pawi ka ti. Hna kan la dawn a nih chuan thiamna hi teh nan kan hmang tur a ni a, ‘ka chumi khami chu a ni a, an ni hi kan mi leh sa an ni,’ kan tih fo thin hi tehna chhe berah ka ngai,” a ti.
Pu Lalrindika Ralte chuan ram leh hnam kal zel dan tur chu thalaite kutah a awm tih sawiin, “Kan ram leh hnam hmalam hun hi keimahni ngei hian kan ngaihtuah tur a ni; midang phutchhuah tur an awm chuang lo. Future neitu chu keimahni hi kan ni. Thalaite hian kan ram leh hnam hi ‘in ta a ni’ tih in hriatchian a ngai takzet a ni. Mi dik lo leh ram leh hnam tan pawha rinawm lote pawh hmachhawn ngam lo a, kan do ngam lo a nih chuan he hnam hi hnam ropuia chhiar theih kan ni ngai lo ang,” a ti.
He hunah hian MZP Gen. Hqrs atangin Pu Jacob Lalmuanpuia, General Secretary bakah hruaitu engemawzat an tel a. Zirlai pass tharte hnenah lawmpuina thilpek hlan vek a ni bawk.