Mizoram Science Society in High School zirlai thlan bikte tana a buatsaih ni 2 awh tur Winter Basic Science Camp, 2023 chu vawiin January ni, 27, 2023 (Zirtawpni) hian Pachhunga University College-ah hawn a ni.
He Winter Science Camp hawnna hun hmanpuitu Prof. F.Lalnunmawia MLA, Vice Chairman Horticulture Development Board chuan thu sawiin “Science thiamna chu khawvel hmasawnna hnuk a ni a, Science chuan kan nunphung leh nitin khawsak a ti nuam a, Science zirna chuan khawvel thil kan hriat thiamlohte min hriatthiam tir a ni,” a ti.
Prof F Lalnunmawia chuan zirlai kalkhawmte chu fuihin “Science thiamna kawnga hnam dangten an thiam chu Mizote pawhin kan thiam thei a ni. General Science, Engineering, Medical leh Agriculture Science-ahte mahni tuina hriat tum ula, Scientist thiam tak in ni thei a ni,” a ti.
He hun hi Er C.Lalduhawma, President, Mizoram Science Society-in kaihruaiin Prof. H.Lalthanzara Principal, PU College leh Mizoram Science Society member ten an hman pui ani.
