Vawiin December 16, 2022 hian kum 2022 atana Congress Party Office kharna hun, Congress Bhavan, Aizawl-ah neih a ni a. He huna thu sawitu zing a mi, Tourism Minister hlui John Rotluangliana chuan corruption case a neih a hriat loh thu sawiin, “Vawiin ni thleng hian corruption case ka neih ka la hre lo a, neih nachhan tur pawh ka nei bawk lo. Khawzawl Tourist Lodge chungchang hi kum 2019 kum tir lam khan Pu. P.C Chuauhnuna, Khawzawl-in Lokayuktah FIR a thehlut a ‘Khawzawl Tourist Lodge sakna tur pawisa a bo’ tiin. Tichuan, Lokayukta in ACB te chu chhui turin a ti ta ni. Khawzawl Tourist Lodge hi central atanga PIDDC scheme lo kal hnuaia hna chi hrang hrang thawh zinga pakhat a ni a, he project pumpui hi hna thawh mek a nih laiin central sawrkar atangin tih tawp (delinked) a ni ta a. Tichuan, NEC lamah leh NEDP lamahte a remchang ang ang a hna min chhunzawm sak tura dil an ni a. Tichuan, NEDP atangin chhawmdawlna cheng vaibelchhe 3.04 hmuh a ni ta a, hemi atang hian Khawzawl Tourist Lodge sak zawh nan pawh cheng nuaih 67.49 chu ruahman a ni leh ta a ni” a ti.
“Hna chhunzawm leh a nih hmain NEC hotuten Khawzawl Tourist Lodge sak zawhna tur cheng nuai 67.49 chu an rawn release tur thu kan dawng leh ta si a, chu ti a nih chuan NEDP leh NEC atanga dah double chu a tul lo e tiin NEDP atanga kan lo ruahman sa chu PIDDC scheme hnuai a hna thawktu dang (contractor-te hnenah) an hnathawh dan zul zuiin pek a ni ta zawk a. NEC atang chuan Khawzawl Tourist Lodge sak zawhna tur cheng 67.49 lakhs chu March 29, 2019 khan sanction hmuh a ni ta a, NEC sum hmang hian sak zawh a ni ta a ni.
”
NEDP pawisa bo ni a sawi cheng 67.49 lakhs chu ACB-ten uluk takin an chhui a, contractor-te pawh a mal a mal in an pawisa dawn zat zawh vek an ni a, office lam atanga pek chhuahnate nen a in mil vek avangin pawisa bo thlau hmuhchhuah pakhat mah a awm lo a, ACB pawhin fel fai takin Lokayukta lamah report an pe tih ka lo hria a heti chung a kan sawrkarin ACB-te hi an ring zo lo a nih chuan CBI chhui tir ngei turin ka phut tlat a ni. Khawzawl Tourist Lodge sak chungchang ah hian pawisa bo thlau pakhat mah a awm lo a, ka director hlui Biakthanmawia nen hian chengkhat mah kan eiru lo a ni tih hi Pathianin min hriatpui a ni. Politics a nih tak avanga thudik leh diklo pawh pawisa lova mimal in tih hmingchhiat tum a in beih vak mai hi a Kristian loa a Mizo lo bawk. Hetiang hi tun hnuah tu chungah mah thleng tawh lo se ka duh a ni,” a ti.
