Dated 17th April, 2023 : Consulate General of the United States of America, Kolkata Melinda Pavek leh a hote chuan nimin Ni 16 April, 2023 (Pathianni) tlailam dár 5:00 khan Central YMA Office-ah lengin hruaitute a kawm a. He inkawm honaah hian US Consul Control Officer Pi Sonia Laul leh Political Specialist Tinku Roy bakah Abhijit Sharma, Security Specialist leh Jay rota Das, Press and Madia Manager ten an telpui a. Central YMA Vice President Lalhmachhuana* hovin Prof. Lalnuntluanga GS leh Asst. Secretary Prof. Malsawmliana bakah CEC thenkhata ten an lo dawng sawng a ni.
He inkawm hona hi Central YMA Vice President in kaihruaiin, Mizoram leh Hnam tana YMA hnathawh hrang hrangte Central YMA GS in a lo hrilhfiah a. Pi Melinda US Consul General chuan YMA hnathawh leh an pawl inkaihhruaina dan chu ropui a tih thu sawiin Mizo thalaite leh US thalaite kawng hrang hranga thawhho dan tur a lo ngaihtuah tur thu leh ei leh bar zawn a kawnga inzirtirna tha neih chu a ngaihpawimawh thute a sawi a. India mite tana US Mission hrang hrangte chu YMA hruaitute hnenah hian a hrilhfiah a ni. Tin, International Youth Leader Exchange prog hnuaiah YMA hruaitute nena thawh ho theihna a awm thu leh tun hma pawhin YMA hruaitu mi 3 te chu US ah leadership training an lo neih pui tawh thu leh chhunzawm dan turte pawh a sawi pui a ni.
Central YMA hruaitute chuan US Consul General hi YMA In Khawmpui Lian, October Ni 24-26, 2023 – a Biatea neih turah lo telve turin an sawm zui nghal bawk a, ani pawhin a hman phawt chuan US thalai mithiam tak takte nen lo tel ngei a duh thu a sawi bawk.
US Consul General hi Mizoramah a la cham rih dâwn a, Mizoram University ah te hun a la hmang dâwn bawk a ni.
