BJP Mizoram chuan thuchhuah siamin, “MADC Election neih meka Campaign Union Minister Pu John Barla chu nimin (3rd May 2022) khan Lengpui Airport atanga a haw thla tur leh Mizoram Sports Minister Pu Robert Romawia Guwahati zin tur nen MNF Sorkar sawisak chhiat mek Lengpui Airport chhungah minute 2 vel an intawng a. Pu John Barla hian ‘Siaha district hmun hrang hrang ka tlawh a, kawng chhia a tam hle a, Siaha district tana Central sorkar in State Sorkar-a pawisa a pek tam tak ngaihtuah in mipuite khawsak, ei leh bara Economy
dinhmun a la ngaihtuahawm hle thu leh Mizoram State Sorkar hian buaipui hmasak tur zawk buaipui thin rawh u’ tiin tlang takin a zilh zawk a ni. Dawt hmanga Press Release siam duh Mizoram State Sports Minister leh MNF Party hian zahna chang hria a sim hmak tawh turin kan hriattir a ni,” an ti.
Thuchhuahah chuan, “Pu Robert Romawia’n nimin a Union Minister hnena a sawi anga tarlan ‘Mizoram pum Minority kan ni’ tia a sawi ve ngawt pawh hi Ministry in Minority area a sawi dan nilo, thudiklo a ni a. Mizoram State hian District Council & Minority Affairs Minister kan neih chuan chumi changtu Minister chuan zirchiangin a sawifiah kan phut nghal bawk a ni. Minister te hian Department hrang hrang chanvo insemin hna an thawk ṭhin a.Pu RRR hian a duham luat ah sorkar Allocation of Business pawh a hre hranglo der nge? a thliar hrang thiamlo zawk tih hi kan zawhna a ni a, hetiang a nih chuan Minister ni tlaklo ah kan ngai bawk a ni.
“Union Minister John Barla in a lo hrilh tawh angin, Minority Affairs Ministry hnuaia Schemes/Programmes ziahna bu Compendium of Schemes/Programmes run by Ministry of Minority in funding dil theih dan a tarlan angin BJP kaihhruai MADC Sorkar thar ah kan district mamawh ang focus in MADC BJP Sorkar thar ah chuan Project thehlut a ni nghal a, Union Minister hian bawhzui a nih tur thu a sawi angin heng Project ah pawh hian hmel thar kan hmu ngei dawn a ni.
“Pu Robert Romawia hian MLA a nihna leh Department pawimawh tak tak enkawltu Minister a nih angin dawtsawi bansan tawh se Mizoram mipui te hi bum tum ringawt lovin Thudik tak hmangin Social Media leh Project hna a thawh ah pawh min hrilh ve tawh zawk turin kan phut a ni. Chuvangin Kan Sports Minister hian India ram bungkhat kan nih anga kan chanpual Projects aṭanga sum siam ringawt a ngaihtuahna-a a lut reng mai hi a pawi hle a, Union Minister lo zin te reng reng thlalak pui tum ngar ngara a lo buai ṭhin te hi Minister tan chuan a zia lo hle ah kan ngai a, thlalak pahnih khat lek hmanga Mizo mipui te leh MNF Party mi leh sa te ngei pawh a bum duh hi a pawi hle a, hetiang rilru ringawt a pu hi Doctor ah inentir a ngai hial ah BJP Mizoram Pradesh chuan kan ngai a ni.
Union Minister of Minority Pu John Barla-a’n a hun hlu tak senga, MADC Election atana BJP tana thahnemngai taka rawn Campaign a, Mara mipui tan chhenfakawm tak hmasawnna min hnutchhiah sak avang pawhin lawmawm kan ti a, dam leh tluang taka a haw thla hi BJP Mizoram chuan lawmawm kan ti hle a ni,” tiin an tarlang bawk.