Vawiin chawhma khan Union Minister of State for Tribal Affairs Pu Durga Das Uikey chuan Eklavya Model Residential School, Tlangnuam a tlawh a. A hmunhma te endikin thawktute kawmna hun a hmang a. Pi Lalzarmawii, Secretary & Commissioner, Dr. R.Lalhriatzuali, Director, Social Welfare & Tribal Affairs leh EMRS, Tlangnuama thawktuten Union Minister hi an tawiawm a ni.
Union Minister of State for Tribal Affairs Pu Durga Das Uikey chuan India ram pum ah hmasawnna inkhairual a awm a pawimawh thu sawiin chumi tihlawhtling tur chuan zirna tihhmasawn a tul thu a sawi a. Eklavya Model Residential School (EMRS)-te chu zirna tihhmasawn nan mi tin banphak leh entawntlak a kalpui a pawimawh thu a sawi.
Union Minister Pu Durga Das Uikey chuan zirtirtute chu naupang nun kaihruaitu pawimawh tak, nun kawng dik leh hlawhtlinna kawng kawhhmuh hna thawktu an nih angin khawvel hna zing a hna zahawm leh ropui ber pawla a ngaih thu a sawi a. Eklavya Model Residential School chu naupang tam takin zirna lam a hlawhtlinna an chharchhuahna hmun pawimawh tak a siam turin thawktute a chah bawk a ni.
Thawktute tarlan danin Eklavya Model Residential School, Tlangnuamah hian zirlai 101 an awm mek a, chungte chu pawl 6 leh pawl 7 zirlai an ni. Zirtirtu 6 awmin thawktu dang mi 11 an awm bawk. EMRS, Tlangnuam sak hna hi DJ Consultancy Services-in thawkin, hna za zela 95 hi thawk zo tawh anga chhut a ni a, March 2025 chhung a zawh fel hman beisei a nih thu tarlan a ni. National Education Society for Tribal Students (NESTS), Ministry of Tribal Affairs kaltlang hian Sawleng, Khawbung, Khawzawl, West Phaileng, Thiltlang leh Lungsenah EMRS sakna turin hma lak mek a ni a. Heng bak ah hian Aibawk, Thingdawl, E.Lungdar, Reiek, Bunghmun, Sangau, Phullen, Champhai leh Bungtlang South-ahte sak belh a nih theih nan ruahmanna siam a nih thu tarlan a ni.
