Uniform inang hman a nih hunah a thlawna sem turin sorkar phut

ZPM chuan vawiin khan thuchhuah siamin, “Mizoram sawrkârin sawrkâr sikula school uniform inang hmang tura ruahmanna a kalpui mêk chungchângah, school uniform thlâk hi zirlai, nu leh pa-te tâna phurrit lian tak a nih dawn avângin school uniform-te a thlawna sem turin Mizoram sawrkâr kan ngen a ni,” an ti.
Thuchhuahah chuan, “Uniform hi a thlawna sem a nih hunah pawh, a supply-tu tur thlanna ah, duhsak zawngte man tang têl tîrna remchâng atâna restricted tender hmanga pe lova, open tender hmang ngeia school uniform supply-tu thlang turin education minister Lalchhandama Ralte kan ngen a, school uniform thlâk a, uniform inang hman hi mi tu emaw vurna ni lo hram tur leh, man tang têltu an awm loh hram ZPM thalai chuan kan beisei a ni.
“Education Minister Pu Lalchhandama Ralte chu a behbawm mai mai a buai lova, sawrkâr sikulah mi nawlpui kan kal duhna tura kan education system tichangtlung a, siam tha turin kan phut bawk a ni,” an ti bawk.