Tunhnaiah ruihhlo thahnem tak man a ni

Mizoram Police te chuan tun hnaia ruihhlo chi hrang hrang an man thu thuchhuah siamin an tarlang, ruihhlo dona kawnga thapui an thawhna kal zelah ruihhlo tam tham tak leh mi 5, Myanmar mi telin man an ni. Thudawn bawhzuiin CID(SB) Ops Team te leh Kanhmun PS (Mamit District) te tang kawp chuan tukin khan Luimawi khaw dai, Mamit District-ah Truck, Lalrinfela (35) s/o Rochungnunga, Zotlang, Aizawl-a mi khalh atangin Heroin Kg 1.161 (hawng 89), International Market rate-a cheng vaibelchhe 5.8 man hu an man. Lirthei khalhtu bakah hian heng mite – 1) Lalsangkima (39) s/o Lalthlanga, Ramrikawn Aizawl, 2) Lalfelpuia (35) s/o Farliana, Zokhawthar, 3) Sanglianthawn (36) s/o Thenliansiam, Pyinkhonegyi, Myanmar leh 4) Lalrinchhana (32) s/o Lalramhluna (L), Vairengte Chhimveng hi man an ni bawk. Kanhmun PS-ah case ziah luh niin thlun zawmpui dangte chhui mek a ni.
Inrinnni tlai khan Vaivakawn PS team te chuan Bawngkawn Sairang Junction, Traffic Point bulah lirthei (Bolero) pakhat lo tidingin, a khalhtu ZD Lalchhuanawma (38) leh R. Lalhmachhuani (50), Lunglei Electric Veng ve ve te kut atangin Heroin gram 501 (hawng 40), International Market rate-a cheng vaibelchhe 2.5 chuang man hu an man. Bawngkawn PS-ah case ziah luh niin thlun zawmpui dangte chhui mek a ni.
Mizoram Police te chuan ni 15.1.2023 zing dar 3 vel khan CID (SB) leh 2nd Assam Rifles tang ho te chuan Thuampui (Aizawl) -ah joint operation neiin, Drozine (Triprolidine HCI & Pseudoephedrine HCI Tablets), tablet 98000 / bottle 49, kg 9.8 a rit, international market-a cheng vaibelchhe ? 9.8 man chu T. Lalhminghlua (27) leh Lalrinfeli (32), Lunglei Venghlun ve ve nia inchhal te kut atangin an man. He thil chhuizuina atangin heng ruihhlo te hi Myanmar lam panpui tur nia hriat a ni. An pahnih hian man niin, a thlun zawmpui dangte chhui mek zel a ni.