Tun thla chhungin Dengue vangin mi 2 thi

Tun thla ni 1 leh ni 21 inkar chhung khan Mizoramah Dengue hri kai mi 78 hmuhchhuah an awm a, an zing ami 2 chu an thi.
Thudawn danin Health department hotute hnen atanga thu dawn danin Dengue avanga nunna chante hi Aizawl district ami ve ve an ni a. Aizawl district chhungah hian Dengue a leng nasa hle ni a thudawn a ni. Kumin January atanga October ni 21 thleng khan Mizoramah Dengue hri kai hmuhchhuah zat hi mi 372 an tling tawh a. Kum dang leh October thla hma zawng khan nunna chan an la awm lo chungin tun thlaah mi 2 an thi a ni. Thla hlui September thla chhung ringawt khan he hri kai hi mi 159 an awm a, a tam ber hi Aizawl district mi an ni.
Dengue natna hi kum 2013 khan a hmasa ber atan Mizoramah hmuh a ni a, mi 7-in an kai a. Kum 2016 khan Dengue natna vei tam berin mi 580 an awm a. Kum 2017 khan mi 136-in an kai a, 2019 khan mi 131-in an kai bawk a ni.
Hetihlai hian Chikungunya hri kai an pung chho bawk a. Kumin January thla atanga October ni 21 thleng khan Chikungunya hri kai hi mi 70 an awm a. An zinga mi 66 hi Lunglei district ami an ni a, mi 4 chu Aizawl district ami an ni. Chikungunya natna avangin Mizoramah nunna chan an la awm lo.