BJP Mizoram chuan vawiin 2nd June, 2023 (Friday) hian BJP State Office, Upper Republic ah Friday Political Session neiin, Dr R Vanlalhruaia NEM Kisan Morcha-in inkhawm a kaihruai a, Vanlalhmuaka, State President-in thusawina hun a nei bawk.
Vanlalhmuaka chuan, “Tun huna Zohnahthlâk ten harsatna kan tawh mek hi Hnam a min siamtu kan Pathian hian a ensan dawn lova, hetiang hun harsa kan tawh mekah hian Sipai hote lam kan hawi angai a. Hnam a min dintu hian engti kawng mahin min ngaihthah dawn lova, a hming kan lam a, a lam kan hawi chuan kan Pathian hian min kalsan ngai dawn lo a ni. Zohnahthlâk tlang hrang hranga awm te tan heng harsatna kan tawh te hi kan thatna ngei turin a inherchhuah ngei kan beisei tlat a ni,” a ti.
Pu Hmuaka chuan sawi chhunzawmin, “Mizoram kan thlir a, kan Sorkar-in min enkawl dan en hian kan Pathian hi a lawm hian ka ring lo va, BJP Mizoram ah kan Sorkar a nih chuan Lalpa’n a hmangaih Mizoram Mihringte, retheihna bawiha tang mek, Politician te’n an bawih beh tlat te hian Retheihna khur atanga chhuaka zalenna leh mahni ke-a ding a, Sum tlem tê tê sem intiama min thlem fo ṭhinna te hi a reh tawh dawn a, mitin tan an mamawh ang hmasawnna thlen tir a, hmala in hna kan thawk zel dawn a, chu chu BJP Mizoram chuan kan tum ber a ni. Chumi thlentir tur chuan theihtawp chhuahin hma kan la zel dawn a ni,” a ti bawk.
Inkhawmah hian Pu K Laldinthara, State Spokesperson-in Zohnahthlak raltlante Party hminga tlawh an nihna leh Union Minister zin report te a pe a, Tv Fela Khiangte, State IT Convener-in Champhai District tlawhna report pe in, Party Member dangte aṭang pawhin thusawi ngaihthlak a ni bawk.
