Tuilian avangin Silchar Mizoram House ah nunphung a la pangngai thei lo

June ni 20 atanga ruahsur nasa in tuilian a siam chu Silchar leh a chhehvela Mizoram House ah pawh zia awm lam ala pan theilo a. He Tuilian avang hian vawiin thlengin Silchar Mizoram House chuan kalphung pangngai a la zawh hlei thei lo a ni.
Silchar Mizoram House Deputy Residence Commissioner sawi danin Tuilian hi a rawn thlen thut avangin inrin hman ani lova, kawtlai a Mizoram House Car pahnih an dah chu a chim pil vek avangin hmantlak lohin a chhia a, Ground Floor-a Room hrang hranga Bungrua an dah zawng zawng, Thutthleng, Khum leh Mattress, Dinning Table, Reception Table te leh Office a bungraw awm zawng zawng Almirah leh File pawimawh engemawzat pawh Tuilian hian ni 7 vel chhung a chiah avangin an chhe vek a, Sofa Set leh Mattress te pawh vawiin thlengin nitin an la phochhuak ziah bawk.
Hetianga Tuilian sulhnu chhui hian nitin an la buai thu Kaptluanga Dy. RC Silchar Mizoram house chuan sawiin, tuilian avanga Mizoram house a thawktu te leh House-a Mizo tangkhang te an harsatna chu a tul ang anga buaipuia chhanchhuak tu Mizoram Police te leh Silchar YMA te chungah lawmthu a sawi bawk.