Tuikuk-te Paih tanna turah voters 207 paih an ni dawn

Aizawl, May 24 : Mizoram electoral roll-a thun tawh; Tripura-a inbenbel tum Tuikuk (Bru) te chu paih tan an ni dawn a, a vawikhatnaah voters 207 paih an ni phawt ang.
Thudawn danin, Mizoram atanga chhukthla Tripura relief camp-a awm leh he state-a inbenbel zui tum zingah Mizoram electoral roll-a la chuang engemawzat an awm a. NGO Coordination Committee chuan Mizoram electoral roll atanga paih turin Chief Electoral Officer (CEO) Mizoram kaltlangin Election Commission of India hnenah an lo thlen tawh a ni.
Tripura sawrkar chuan tunlai hian Tuikuk relief camp-a awmte Tripura electoral roll-a thun hna a thawk mek a, tun thlengin mi 1090 thunluh an ni tawh a, ERONet ah pawh thunluh an ni tawh. He camp-a awm dang voters 1786 chuan Tripura electoral roll-a luh dilna an thehlut ve tawh bawk a, roll buaipuitute hian a thunluh hna an thawk leh mek bawk. Hei baka electoral roll-a thunluh dil tur an awm a nih chuan an inbenbelna tura chhawmdawlna leh thildang an dawn kim hnu a tih fel tum a ni tih Tripura election official-te chuan an sawi.
Mizoram sawrkarin a ngen angin Tripura electoral roll-a thunluh fel tawh mi 207 chu CEO Mizoram hnenah Mizoram electoral roll atanga paih theih an ni tih a hriattir tawh a, Tripura roll lama thunluh tawhte pawh Mizoram roll atanga paih tura an rawn thawn zel beisei a ni tih CEO Mizoram office chuan a sawi a ni.