Tui tla nia rin la zawng zel

Aizawl, May 19 : Tuirial tuikhuaha tla nia hriat hnamdang pakhat chu zawn mek a ni a. Ni hnih an zawn hnu ah pawh tuiah emaw a kam velah emaw hmuh ala ni lo.
Thudawn danin Kolasib district Saipum ram chhunga Tuirial tuikhuaha sangha mana riak, Sheril @ Dilip c/o Lalchangliana, Saipum chu May 17 zingkara a lenkhang zar phelh tur leh nghakuai kam en tura a chhuak chu May 18 zingkar thlenga buka a let tak loh avangin sangha mana riak ve tho a buk hnaih amite chuan an ngaihven a, li laiah a pum hman an hmu a, pum chungah hian a kawr, lukhum leh a chapal hmuh a ni. Amah hi a chin hriat a nih tak loh avang leh a pum awmna laite rinzawnin tuiah hian a tla nia ngaih a ni a. Saipum YMA chuan Nilaini atang khan zawng tanin, Ningani thleng kha chuan hmuh a la ni lo.
Ruah a tlak deuh reng avangin chet a har a, lui chungah thli a tam avangin lawngleng phei chu a hman hleihtheih loh niin Saipum YMA hruaitute chuan an sawi a. Mizo danin ni sarih ralhma chu zawn chhunzawm zel an tum tih an sawi.