Nimin zinga Venghlui leh Tuikual South Area-a awm Treasury Bazar kang chu vawiin khan thenfai hna thawh a ni a, naktuk lam hi chuan helai Bazara thute hian an bungrua zuara thut hman ngei an tum niin an sawi a.
Hetih lai hian AMC lam chuan Gate siamna tur thingzai pawh an dah thleng tawh ve thung a, Bazara thute hi an thu zui thei dawn em hriat a la ni lo.
TarlaN tawh angin nimin kangmei chhuah ni khan kangmei chhuahna hmun hi AMC Mayor Lalrinenga Sailo chuan tlawh nghalin, bazar atan hman leh tura siam that tum ani tawh lo tih a sawi bakah Treasury Bazar chu tiamchin awm lovin khar rih a nih tur thu a sawi a, he bazar-a thute tan hian a thlang lawka AMC Complex, Tuikual South-ah an tan hmun a awm a ti a, Tuikual South huam chhunga kawngsira Inrinni-a inzuar thin te pawh inzawrh phalsak a nih tawh loh tur thu a sawi.
Chhinchhiah danin Venghlui area lamah dawr 53 a awm a, heng zinga 35 chu kang chhe zingah an tel a, Tuikual South lamah hian dawr 29 a kang chhe bawk a ni.
