Cheng nuai 487.45 senga sak Chaltlang Tourist Lodge Annex Building thar chu nimin khan Tourism Minister Robert Romawia chuan a hawng. Tourist Lodge Annex Building thar hawnna inkhawm hi Tourism Department Director Saitluanga’n a kaihruai a ni.
He building thar hawnna inkhawmah hian Robert Romawia chuan Mizoram Tourism Department-in hma a sawn nasatzia leh khualzinte tana thlenna tur nuam tak Tourist Lodge Annex building a hawng thei chu lawmawm a tih thu a sawi. Sorkar laipuiin ‘Responsible Tourism’ leh ‘Sustainable Tourism’ a kalpui mek behchhanin Mizoram pawhin ‘Mizoram Responsible Tourism Policy 2020’ a kalpui mek a, Tourism Department-a officer leh staff te inpekna leh thawhrimna zarah Tourism Department chu department chhuanawm tak a ni mek zel a ti. Minister chuan Tourism Department-a project hrang hrangte tarlangin infrastructure project-te hian Mizoram sorkarah sum tam tak GST leh Labour cess hmangin a chhunglut thin a, department hnathawh kallai piah lamah sum dehchhuahna tur kawng dangte hmuh thiam a pawimawh thu a sawi. Minister chuan Mizoram chhunga Tourist Lodge-te chu mipuiten thlen nan hmang fo se, mipui leh sorkar sum tuakna a ni tih hre rengin lodge hmang uar zual turin a duh thu a sawi bawk.
Annex building sakna hi Destination Development Scheme in the State of Mizoram, Ministry of Tourism (NE Section) hnuaia hmuh a ni a. He building hi teh kualin metre 2462.28 bial a thut a, chhawng 4 (Basement-2, Basement-1, Ground Floor leh 1st Floor) a sang a ni. Basement-2 ah Type-1 Quarter 6 a awm a, Basement-1 ah Conference room mi 280 leng, Board room mi 75 leng, Store room leh Lounge te a awm a. Ground Floor-ah VIP Suite 2 leh Room 8 awmin, 1st Floor ah VIP Suite 2, Room 8 leh Store room 2 a awm bawk. Ministry of Tourism atanga sum hmuh bakah hian Tourism Department-in room floor-tiles te, conference room-a floor tile te leh furniture leh furnishing te a tum vek bawk.
Inkhawm kharnaa lawmthu sawitu Tourism Deptt. Jt Secretary V. Lalengmawia chuan tun thla November ni 16-19, 2022 chhunga International Tourism Mart neih turah mipui zawng zawngte tel theuh turin a sawm a ni.
