Vawiin Dec, ni 17 2024(Thawhlehni) chawhnu dar 2:30 khan Megawatt 120 thar chhuah theihna tur Tlawng Hydel Project khuahna tura ruahman North Lungleng bula Tlawng kamah Pu F Rodingliana, Power Minister chuan Press Conference buatsaihin thuthar thehdarhtute nen inkawm hona an nei.
Power Minister hian he Tlawnglui khuah tur chungchang sawifiah in Ministry of Water Resources, Govt. of India chuan Tlawng HEP Survey & Investigation (S&I) thawh nan leh Detailed Project Report (DPR) siam nan kum 2014 khan Rs.11.55 crores a sanctioned a, He hna hi Central Water Commission(CWC) thawh tura tih a ni. CWC chuan Survey & Investigation hna hi February. 2015 khan thawk tan in tunah hian DPR siam pum turin hma a la mek zel a ni.
Tun a Survey & Investigation neih tawh atanga a lan danin Tlawng Hydro Electric Project(HEP) hi Aizawl bul hnai North Lungleng bula siam tura ruahman a ni a, he Project hian 120 MW a pe chhuak thei dawn a ni. North Lungleng bul Tlawng luiah Tuikhuah siam a ni anga, a tuikhuah(Dam) san zawng hi 120 meters a sang a ni anga, Village council eng emaw zat ram Tuikhua hian a chim anga, amaherawhchu, khua leh in engmah a chim buai dawn lova ni. Tuikhuah hian uncultivable area 2888 Ha. leh Cultivable area 187 Ha. vel chim tura ngaih a ni. A tuikhuah hi Thenzawl piah Ramlaitui/Kawlhawk khua zawn vel thleng in a dil dawn a ni.
CWC lam hian Topographical Survey te, Geotechnical investigation te, Seismic Study te, Construction material Survey te an ti zo tawh a. Tuikhuah/Dam siamna tur hmun a foundation study hi eng emaw chen kalpui tawhin lei chhungril awm dan zirchianna Drifting hna te hi an la bak a. He hna thawk tur hian tender koh tawh niin, tender evaluation tih mek a ni a. He hna hi tluang taka thawh a nih chuan thla 4 vel awh tura ngaih a ni. Drifting work hi zawh fel a nih veleh Design te cost estimate te thawh tan nghal a ni ang. Kum 2025 lai hawl velah chuan DPR hi peih fel beisei a ni a. DPR hi peih fel a nih veleh Mizoram sorkar chuan he project ti hlawhtling tur hian kut a thlak nghal dawn a ni.
He project hian tui 1009.6 Million Cubic Meter a khawl theih dawn avang hian, he project atanga power generate nan a tui hman te chu Tlawng lui recharge na tha takah a chang dawn a. Tun hnaia Aizawl khawpuiin thal laia harsatna kan tawh thin, Tlawng lui atanga tuithianghlim duhkhawp pump chhoh tur awm lo fo thin pawh a sukiang nghal bawk dawn a ni.
