“ZPM kalphung thar MLA fund sem dan hi tlawmngai pawlte hnuaichhiahna leh dan kalha Party mite uchhuak taka duhsakna a ni,” VL Krosshnehzova, General Secretary, MNF General Hqrs. chuan a ti.
Vawiin khan Aizawl Press Club ah VL Krosshnehzova chuan chanchinthar lakhawmtute kawmin, “Tha bera insawi ZPM Party chhuanvawr Dr Vanlalthlana Aizawl North II bialtu MLA-in a bial a enkawl dan tlem azawng kan han tarlang dawn a ni,” tiin a hnuai a mi ang hian ZPM hmalakna a sawi.
“Aizawl North II MLA huam chhungah hian Local Council 9 a awm a, an ni hian hneh takin an veng theuh an enkawl mek a. Hei bakah hian Mizo-in tlawmngai pawl rinrawla kan neih YMA, MHIP, MUP leh Sporting Club hrang hrangte veng tinah hian chak takin an ding theuh a. Heng pawlte hi MLA fund pek theih sorkar pawmpui vek an ni.
“Hetianga pawl rintlak, sorkar pawmpui pawl veng tina an awm teuh lai leh Local Council tha tak tak veng tinah an awm lai hian Aizawl North II bialtu MLA chuan, Aizawl North Development Society a din chawp a. Chu pawl a dinchawp hmang chuan a biala hmasawnna hna zawng zawng deuh thaw a thawh tir a. Agency dik leh rintlak tam tak a biala an awm laia pawl dinchawp deuh vek a hmang ta mai hi MNF chuan mak kan ti hle. Mipuiin an aiawha veng chhung rorel tura an thlan Local Concil-te leh tlawmngai pawl zahawm tak tak YMA, MHIP, MUP leh NGO dangte zahlohnaah kan ngai a ni.
“Aizawl North II bialtu MLA Dr Vanlalthlana hian an Party bil mi tlemte duhsakna hleihluak takin a kalpui mek a, agency dik leh rintlak tam tak an awm laiin an party bil liau liau an invulh theih nan agency a dinchawp duh hi MNF chuan mak kan ti hle a. He agency dinchawp hmanga an hnathawh hlawkna hi ZPM Party bil mi tlemte leh an MLA hian an pumbilh mek a ni. Hetianga khawtlang leh tlawmngai pawlte pawh zah zo lo a, an agency din chawp hmanga an invulh duh hian ZPM zia dik tak a pholang chiang hle.
“February ni 16, 2023 khan Ramhlun South YMA, Y Section chuan thuchhuah an siam a. An thuchhuahah chuan, ‘ZPM, Ramhlun South Unit III te chuan Vengchhung hmasawn nana MLA fund Rs 2,50,000/- an hmuh chu Ramhlun South YMA, Y Section In sak mek sak chhunzawm nan min hlan a ni. Tin, hemi sum atang hian Rs 30,000/- (12%) chu ZPM Ramhlun South Unit III te hnenah Ramhlun South Branch YMA, Y-Section chuan lawmthu sawi nan hlan let a ni,’ tiin an ziak a ni.
“Ramhlun South Branch YMA, Y-Section-te thuchhuah hi thudik tak a ni a, he an thuchhuah atanga a lan danah hian ZPM Ramhlun South Unit III-te hian MLA fund an dawng tih a lang chiang hle. MLA Fund Party unit hnena pek hi danin a phal lo a ni. ZPM Unit-in YMA In sakna atanga 12% (Rs 30000/-) an la duh ngat phei hi chu a mak hle. Party mite hleihluak taka duhsak duh vanga dan phal loh thleng thlenga thil ti duh ZPM MLA chet dan hi, an thusawi thin dan nen a inmil lo hle a. An sorkar lo chung pawha dan bawhchhe khawpa uchhuaka Party mite duhsak duh hian, khawi lamah mah mipui sorkar an din lul lovang tih a chiang a ni.
“ZPM kalphung thar MLA fund sem dan hi tlawmngai pawlte hnuaichhiahna leh dan kalha Party mite uchhuak taka duhsakna a ni tih kan puang a ni.
“Mipui sorkar din tura insawi, sorkar chak leh huapzo din tum inti, kalphung thar zuar a, sorkar kal tawh zawng zawng chhe vek ang hiala puhtu ZPM Party-te bumna thang lakah mipuite i fimkhur ang u,” a ti bawk.
