Vawiin khan ZPM Gen. Hqrs. Thalai chuan Aizawl Press Club-ah chanchinthar lakhawmtute kawmin, “Tun hnaia Heroine Kg 4.722 chungchangah fak phu tak kan Police-te pawh fak hman lo leka Henry Lalbiakzinga Chhungdeng nena ZPM-in inzawmna nei ang leh, politis chhe mi he Mizoramah awm tawh lo se kan tih hmanga dawt thu phuahchawp hmanga ZPM Minister leh Party hruaitute tihhmingchhiat tumna tenawm tak hi ZPM Thalai Headquarters chuan tha kan ti lo a, thubelhchian dawl lo theh darhtute hi a tawp thlenga dan hmanga umzui kan tum a ni,” an ti.
ZPM Thalai hruaitute chuan, “Ram hlui zia politics changchawitute’n thlalak hlui hrang hrang zawng khawm a, zeldin thubawla dawt phuahchawp hmanga mipui rilru huai kawi thei tura social media-a thu an vawrh darh hi ZPM Thalai chuan kan ngai thutak hle a; ruihhlo tawlhtu hnen atanga ZPM-in pawisa an dawng anga inpuhna phei hi chu ngawih bopui chi-ah kan ngai lo a ni. He dawt thu hmanga kan Minister-te leh ZPM Party beihna hi intihhmingchhiat tumna ni ngeia kan ngaih vangin vawiinah hian mipui hmaah thu dik hailanna a nih nan ZPM min beitute lakah hian FIR kan thehlut dawn a ni.
“Tin, Mizoram Police leh Excise Department hian tun hma pawhin a hlawm lianin Heroine hi an lo man fo tawh a, media hmaah kan Minister-te hian hming that lak tuma thupuan emaw, sawifiah emaw an nei ngai lo a, Department-in thu an chhuah bak chu media hmaah hetiang thil hi an sawifiah zui ngai lo. Tun hnaia Heroine Hawng 440 manah pawh a mantu Police Department-in an thuchhuah hmanga an puanzar hi thil kalphung pangngai a ni a, Police-in a chhui hna an thawh zawh rualin Court chinfel turin an thehlut thin a ni,” an ti bawk.
