Vawiin January 28, 2023 hian Aizawl City College Joint Students’ Union (ACCJSU) chuan Bawngkawn South YMA Hall-ah Assembly cum Election an nei a. Lalrindika Ralte, Hachhek bialtu MLA-in Khuallian niin a hman pui.
Khuallian Lalrindika Ralte chuan zirlai kalkhawmte chu fuihin, “Thalaite hi kan ram leh hnam hmalam hun neitute in ni a, a siamtha tu tur pawh nangmahni in ni. Kan ram dinhmun hi in hrechiang tur a ni a, eng dinhmunah nge a din a, eng kawng nge a zawh tih hi ngun takin in ngaihtuah tur a ni. Chu in hmalam hun chu tihchhiat in a awm em tih te ngun takin in ngaihtuah tur a ni a, a venhim hna thawktu tur pawh nangmahni in ni,” a ti.
Zirlaite chu tute emaw hmanrua a tang mai mai lo tura fuihin, “In theihna leh in chakna hi mimal emaw, pawl emaw, political party-ten hmanruaa an hman in phal tur a ni lo a. Tuten emaw an duh an tih tir a, an duh loh an tih tir loh mai mai theihin in awm tur a ni lo. Chutianga bungrua anga hman tumtu che u an awm a nih chuan, chung mite chu in hmelma an ni a, ram leh hnam hmelma an ni bawk tih in hriat ka duh,” a ti.
“Chapona hi hmasawnna daltu a ni a, tuna i dinhmun kha i chapopui a nih chuan i dinhmunah i lungawi tawk tihna a ni. He khawvelah hian chapopui tlak khawpa dinhmun tha leh ropui a awm kei chuan ka hre lo. Khawvelah hian mitin mamawh phuhrukna tur a awm tih a ni a, amaherawhchu, duhamna chhun khahna erawh a awm lo. Duhamna hi kan mualpho puia, kan nunin a chauh phah a, mi tam takin kan chhiatpui mek a ni. Duham lovin, chantawkah lungawi ila, hmasawn turin i inbuatsaih ang u. Engtik ni ah emaw chuan kan ram hi dinhmun thazawk ah ala ding dawn a. Chumi huna chanvo tha in chan theih nan kan ram leh hnam tan in theihna sangber hlan turin in inbuatsaih tur a ni. Pathianin kan chungah ro a la rel dawn a, chumi hre reng chung chuan kan nun hi fimkhur takin i hmang theuh ang u,” a ti.
ACCJSU Assembly-ah hian Aizawl khawpui chhunga College hrang hrang 10-a Students’ Union hruaitute an kalkhawm a, kum thar 2023 atana hruaitu tur an thlang nghal a, inthlan hi RB Lalmalsawma, NSUI President leh a thawhpuiten an buaipui a ni.
