Vawiin August 9, 2023 (Nilaini) hian Mizoram Taxi Association hruaitute leh Pu Lalsawta, President MPCC te chu Mizoram Taxi Association (MTA) Office Dawrpui-ah an inkawm.
He hunah hian MTA hotute chuan Taxi hmanga an eizawnna kawnga an ruahman leh an harsatna hrang hrang te an lo thlen a. Pu Lalsawta chuan, hmasawn turin hmathar lak a ngai a, a tha lo paih a, a tha zawk hmanga hmalak a ngai a ni tih sawiin, Taxi hmanga eizawnna hi eizawnna satliah a ni mai lo a, ram rawngbawlna a ni, a ti bawk. Mizoram rawn tlawhtu khualzin lo dawngsawngtu pawimawh, Mizoram nihphung pholangtu in ni a. Hemi kawngah hian Sorkar hi mipui phurrit chhawk zângkhaitu tur anih angin in harsatna leh ruahmanna te hi chin fel harsa a ni lo, a ti.
MPCC President Pu Lalsawta chuan, MTA te’n ruahmanna tha tak tak an lo nei chu lawmawm a tih thu sawiin, Taxi hmanga eizawngtute harsatna tawh chu chin fel harsa lo tak vek a ni. Hengte hi a ti thei dinhmuna kan din a, sorkarna kan siam phawt chuan kan sutkian sak ang che u, hei hi Congress Manifesto No. 3 ah pawh uluk taka dah a ni, a ti bawk. Taxi hmanga eizawngtute leh Taxi chhawr tangkaitu mipuite nena rualkhai zawka kal dun theih chu ram tan a tul a ni, a ti a. Taxi hmanga eizawnna tih hmasawn leh tihchangtlun chu Smart City siam tura tih ngei ngei tul leh pawimawh a ni, a ti bawk.
Mizoram Taxi Association hi Zoram Taxi Owners’ Association (ZTOA) leh Zoram Taxi Driver’s Association (ZTDA) inchhunfin a din a ni a. November ni 27, 2017 khan sorkarah Registration tiin, tunah hian Mizoram pumah Taxi 4000 chuang an awm mek a; Aizawl District ah Taxi 3500 chuang a awm. Aizawl khawpui chhung bika Taxi-a eizawngtute hian chawlh kar khata ni 6 awmah ni 4 an tlan (service) thei a, ni hnih an chawl/ding thung a ni. Khawpui chhungah Taxi stand 75 awmin stand nei lova tlan kual an awm nual bawk. District pali (4) ah Sub-Headquarters an nei a, District dangah Branch pathum (3) an nei bawk a ni.
Vawiina Mizoram Taxi Association leh Pu Lalsawta, President MPCC te inkawmna hun hi Pu R. Lalawmpuia, President MTA in a kaihruai a. Nl. Elizabeth Malsawmtluangi, Social Media Department MPCC leh MPCC Transport Department hotuten an tawiawm a ni.
