Vawiin September 10, 2023 (Pathianni) hi Mizoram Synod hnuaia Naupang Sunday School Inkhawmpui Ni a ni a, Presbyterian Kohhran hnuaia Bial hrang hrangah Naupang Inkhawmpui hi hman a ni.
Naupang Inkhawmpuiah hian Pathian thu, hla leh thu inchhang hmangin inelna neih a ni a. Heng bakah hian naupangten item hrang hrang a remchan dan angin an nei bawk a ni. Naupang Inkhawmpui hi Bial tam zawk chuan intihsiakna atan an hmang a, Bial thenkhat erawh chuan intihsiak lovin an hmang thung.
Naupang Inkhawmpui hi a tirah chuan Missionary-te thahnemngaihna avanga neih tan a ni a. Kum 1931 khan Aizawl Tlangnuam Kohhranah neih a ni a, hei hi Naupang Inkhawmpui hmasa ber nia hriat a ni.
Tunhma lam chuan Naupang Inkhawmpui hi Bial hrang hrangin an remchan hunah an nei mai thin a, tun hnai deuh atang khan Bial tinte an kal rual theih nan MSSU chuan Sunday School Zirlai Syllabus-ah Naupang leh Senior Inkhawmpui hun tur an ruahman tel ve ta a ni. September Pathianni vawi 2-naah Beginner Department-Sacrament Department leh Pathianni vawi 3-naah Senior Department ten inkhawmpui an nei thin a ni.
Kum 2022 Synod Inkhawmpui report-a a lan danin Sunday School 1028 a awm a, Beginner department atanga Sacrament department-ah zirlai 1,16,424 leh zirtirtu 23,854 an awm a ni.
