Mizoram in energy – kawlphetha, tuialhthei leh adt. renchem zawk leh daihzai zawka a hman theihna tur State Energy Efficiency Action Plan (SEEAP) chu State Designated Agency (SDA) Electrical Inspectorate, P&E Department Zuangtui chuan palai sawm bik te hmaah phochhuahna hun leh tlangzarhna hun Hotel Regency ah a buatsaih a. He hun hi Er R. Romawia, Chief Electrical Inspector chuan kaihruaiin, Deloitte leh Green Tree aiawh te atangin zirchianna te ngaihthlak leh sawihona te neih a ni.
SEEAP hi Bureau of Energy Efficiency (BEE), Ministry of Power, Govt. of India kaihhruaina hnuai ah Mizoram tan Deloitte leh Green Tree te chuan zirchianna neiin, energy hrang hrang te renchem leh daihzai zawk a hman a nih theih dan tur ruahmanna leh kalphung tur te a buatsaih a. Khawvel lum belh zel tur dona kawng a India hmachhawp neih te tih hlawhtlinna tura Mizoramin a phak tawk a hma a lak theih dan tur kawng hrang hrang ruahman a ni. Hemi atan hian heng – Building Sector, Industry Sector leh Transport Sector te thlang chhuakin, energy (kawlphetha leh tuialhthei) renchem leh daihzai zawk a hmanral a nih theih dan tur kalphung leh kaihhruaina te duan a ni a. Mizoramin thianghlim leh daihzai zawk, hmalam hun atan pawh a boruak chhia tichhuak tlem zawk a hmasawnna kawng a zawh theihna tura lungphum pawimawh tak a ni. He hmalakna hian kum 2030-31 thleng a energy renchem chungchang a zawm mai theih tur leh tihhlawhtlin nghal theih tur ruahmanna te zirchiangin rawtna te a siam bawk a ni.
