Serchhip Hmar veng YMA hall ah March 4th 2025 chhun dar 12 khan neih a ni. CM Pu Lalduhoma bial, khawpui ber Serchhip Hmar veng ah hian VC seat 5 awmin Congress party in member 3 neiin sawrkarna an siam.
A lawmna hun Serchhip Hmar veng unit Congress buatsaihah hian MPCC President Pu Lal Thanzara chuan mithar lawmluh pahin a tel pui.
Pu Lal Thanzara chuan, Serchhip bialtu MLA chu sawrkar loh laiin he bial ah hian MLA a ni tawh a. He bial leh abik takin Serchhip leh Thenzawl khua tan phei chuan thutiam leh malsawmna thlen a tum te a sawi nasa hle. Mahse tihlawtling thei dinhmun CM meuh anih hnu hian a thil tiam tih puitlin chu sawi loh, hmalakna hmuh tur a awm mang lo a ti.
Pu Lal Thanzara chuan Politics hi Pathianin mihring te tisa lama enkawlna tura min pek a ni a. Chuvangin politics hi thil thianghlim lo leh thuthiam kawrawng mai mai a in bumna tur a ni lo a ti.
Tu party te hian nge inthlan dawna an intiamna ti hlawhtling tam tih te hi chhut let harsa lo tak a ni.
Cogress sawrkar tirh phatah, NLUP bul tan nan kan sem ang kan ti kan sem mai. Rangva inchung nei lo tan kan sem ang kan ti leh a, tu mahin min awih sak loh laiin kan sawrkar a chhungkaw sing 3 chuang inchung kan khuh sak leh. Cheng nuai 1 leh a chunglam thlengin NLUP changtlung zawk kan tiam leh a, kan sawrkar leha chhungkaw nuai 1 leh sing 4 chuang hnenah NLUP kan pe.
Kum 30 chhungin Mizoram sawrkar piang tawh ten engmah hmasawnna an thlen lo, “min enchhin rawh u, kan danglam dawn” tiin ZPM ten an tawngkam thiamna in mipui leh thangthar tamtak anhmin a chuvanga sawrkar chu an ni. An sawi ang a, engmah ti lo sawrkar chu ni ila vawiinah Mizoramah ngei Doctor a zir theih lovang. Vawiin a kan buaipui mek Lengpui Airport te hi sawi tur a awm lovang. Tawngkam thiamna te leh inbumna mai mai hmanga sawrkar an nih vangin sawhthing chungchangah pawh an sawi ang an tih theih loh vangin ZPM sawrkar hi sawhthing vangin an tlak leh ka ring a ti.
Mizo te hi kohhran mi kan nihna angin, ringtu kan nihna hmanga kan awmna party tur te hi kan thlan thiam a ngai. Congress party hi India zalenna sualchhuaktu leh danpui siamtu, sakhaw zalenna dah pawimawhtu a ni a, tunah erawh BJP hnuaiah kan chep em em a ni.
Pathian leh mipui te zarah sawrkarna kan chang leh anih chuan kutkhathawktute kan ngaipawimawh ber ang a, NLUP hmangin rethei te kan khaichhuak ang a ti.
