MPCC chuan, “Chief Minister hova Council of Minister thukhawm chuan School 180 te chu provincialised in, Lumpsum grant-in-aid a awm mek school 52 te chu tunhmaa la awm ngai lo provisional adhoc grant-in-aid ah a hlangkai bawk a. Heng bakah hian lumpsum grant-in-aid a hlankai school 31 an awm bawk a. School provincialised leh upgrade thar zawng zawng te chu school 263 lai a ni,” an ti.
Vawiin khan MPCC Media Chairman Lalremruata Renthlei chhuan Aizawl Press Club-ah chanchinthar lakhawmtute kawmin, “Mizoram sawrkar cabinet meuhin Grant in aid pe tura an tih Zasai Memorial HS, Siaha hi school awm tawh lo a ni a, defunct schoool (school awm tawh lo) a ni.
“He school hi Siaha MNF MLA candidate tur Pu Lalmalsawma Zasai pa Pu Zasai hriat reng nana school din a nia, kum tam kal tawha tihtawp a ni a, a building apartments te pawh mimalin khawsak nan an luah deuh vek tawh a ni.
“Mizoram chhungah mimal, khawtlang leh Kohhran school tamtakin sawrkar tanpuina an dawn ve theih loh laia Siaha MNF MLA Candidate tur Pu Lalmalsawma Zasai te chhungkaw school Zasai Memorial HS school awm tawh lo MNF sawrkar tanpui dawng tur an han ti mai hi Zoram mipuite mak tih a tling a ni. School awm tawh lo adhoc-a a dah ta mai hi Cabinet meeting hi a lu a hai em ni?
“Mizoram sawrkar pawh school awm tawh lo tanpuina pek tur an tih school hi paih nghal a, thil dik lo leh tenawm tak titute hi chhui chhuak a, danin a phut angin an phu tawk hremna pe ngei turin kan phut tlat bawk.
“Kum tam tak chhung Zasaia Memorial School hi awm tawh lo a ni chungin sorkar atanga tanpuina a hmu reng thin em tih hi kan zawhna a ni a. High School bik te tana tanpuina sorkar-in kumkhata Rs 2.5 lakh a pek hi an dawng reng thin em. School awm tawh lo a ni tih chu eng vangin nge School Education Department hian a hriatloh theih? Eng vangin nge tanpuina sum School awm tawh bawk si lo chu a pek reng?
“Mimal induhsakna avanga hetiang school awm tawh lo, duhsak uchuaka tanpuina pek zui reng hi a rang thei ang bera sût leh turin Congress Party chuan Mizoram Sorkar kan ngenin kan hriattir a ni.
“Kan minister zahawm tak Pu Lalchhandama Ralte department enkawl mek Education department hnuaia Samagra hnuaia thawk te dinhmun siam that tumna sorkar in a nei em? tih kan zawh duh bawk a.
“Samagra hnuaia thawk te hi Education-a a foundation pawimawh ber an ni a, an pos-ah an awm tha in an awmnaah hna an thakw tha hle sia a. An dinhmun siam that sorkar in a ngaihtuah em tih kan zawt duh bawk a ni,” a ti.
