Mizo National Front chuan thuchhuah a siamah, “Furpui thlen lai a ni a, ruahpui mai bakah thlipuiin nasa takin min tuam vel mek a, chhiatna tinrengin zoram dung leh vang a tuam mek laiin, kan Sawrkar, Inrenchem thupuia puanga kalpui mek tute chuan a hautak thei ang berin Lunglei khawpui ngai pawimawh derin, Cabinet Meeting an neih chilh hi thil tangkailo takah MNF chuan a ngai a. Rorelna hmun sawn aiin an thurel leh a taka kenkawhnain Lunglei leh Chhim lam tan hian thawk zawk se a duhawm hle a ni,” an ti.
Thuchhuahah chuan, “Khawchin thlirtute puan lawk angin ni thum vel zet ruahin min chenchilh mek a, nizan zankhuain chawllovin a sur a. Veng hrang hrangah chhiatna, leimin avanga inchim, nunna chan leh mangang au thawm te, kawng kaltlang theihloh thawm ten min chim a. A hmaa inbuatsaihna awm thei reng karah naupang ten ruah sur kara School an pan vek tawh hnuah Sikul chawlh an han puang leh hnuhnawh bawk a. Sikul tam takin Sawrkar thuchhuah chu an buaina tizualtu ah ngaiin, zawm enah an en lo hial zawk. Hetianga rorelna fello hi kan ramah ala thleng ngailo, an enkawl mipuite zahlohna leh mahni chauh inngaihtuah sawrkar a nihzia pholangtu ah MNF chuan kan ngai tlat a ni.
“Hetianga rorelna fello hnuaia khawsak hi Zoram mipuite hian kan beisei a ni lo a, an insawi anga thil tha tinreng min tiam thlentu tur leh thlamuanna sawrkar ni tura kan beisei a ni. An insawi ang ni hauh lova ‘a leh alinga vuttui thlawr bel’ anga khawsa sawrkar kan nei ta mai hi pawi kan tiin, sawrkar kan hrawn mek hian mipui bei a ti dawng takzet a ni. Mipui aiawha rorel tur, mipui sawrkar din tum tute khawsak dan hi a lungchhiatthlak takzet a ni. Tui harsa leh Eng hmuh that mumal awmlo kara manganna leh harsatna ruama mipui rum mekte dinhmun hi hmuh tum ve in, mipui mamawh anga khawsa turin ZPM sawrkar hi MNF chuan kan phut takzet a ni,” a ti bawk.