Lengpui Airport-ah kum 2020 atanga Indigo Airlines-a Executive Security hna thawk Nl. H.T. Vanlalruati chu Crystal Meth tam tham tak man chungchangah leh .22 silaimu man chhuah kawnga a thawh hlawk em avangin Mizoram Police chuan a chhuang hle a.
Venhimna leh dan kenkawhna kawnga a taimakna leh thawhrimna te chu Mizoram Police chuan lawmawm a tiin a chungah lawmthu a sawi a ni.
October ni 3, 2023 zing dar 09:20 khan H.T. Vanlalruati chuan Indigo screening point-a bungrua an endik laiin thil rinhlelhawm a hmu a, an han en fiah chuan Methamphetamine (Crystal Meth) nia rinhlelh packet 10 lai mai, 10.200 kg-a rit a lo ni a, a man hi cheng 25,495,000 vel nia chhut a ni. He ruihhlo hi suitcase pawl (American Tourister) pahnihah awmin, chu suitcase chu passenger Mrs. Lalremthangi (38) leh Mrs.Tinchuaii, Letpanchhawng, Myanmar te ta niin, Aizawl atanga Delhi-a zin thlak tum te an ni. He ruihhlo man chungchangah hian Special Narcotic P.S case No. 48/2023 Dt 03.10.2023 u/s 22(c) ND&PS Act 1985 / RW 14 A Foreigner Act 1946 hmangin thubuai siamsak an ni. Tin, October ni 9, 2023 dar 01:00 PM-ah passenger pakhat, William (35), Churchandpur hnen atangin .22 silai mu pakhat a hmu chhuak bawk a, Sairang Police kutah hlan niin Sairang P.S Case No.46/2023 Dt 09.10.23 u/s 25(1-B) (a) Arms Act ziah luh a ni bawk. H.T. Vanlalruati inpekna leh hnathawh tha tak hriatpuina atan leh lawmthu sawina atan Pu Anil Shukla, IPS, DGP Mizoram chuan November 23, 2023, zing dar 10:30 AM-ah pawisa fai Rs. 5000/- a hlan a. Dan leh thupek kenkawhna kawngah leh mipui himna tur kawnga a tha thawh te avangin H.T. Vanlalruati chungah Mizoram Police chuan lawmthu a sawi tak meuh meuh a ni.
Mizoram Police chuan, “Dan kengkawhtu pawl dangte leh private sector-a thawkte pawh huamin, misual thiltih dona kawngah leh mipui himna tur kawngah thawhhona tha tak neih a pawimawhzia a hria a, Mizoram mipuite him zawk nan thawhhona tha vawng nung zel turin Mizoram Police chu a inhawng reng a ni,” an ti.
