Dt 25th March’25 ( Thawhlehni ) : ZPM Thalai chuan thuchhuah siamin, “Ruihhlô (Damdawi) hman sualna a Mizo mipui leh chhungkua tam takin harsatna kan tawh lai mêk a, a phêna sum leh paia hlawkna a awm tih hria a, ruihhlô tawlh rûk kawnga inphum ru mi ṭhenkhatte man chhuak tura Mizoram Police leh Excise & Narcotics Department hmalak mêkna hi ZPM Ṭhalai Hqrs chuan chhuanawm kan ti a, an hmalak zelna tura theihtawp chhuaha ruihhlô dona kawnga chak taka hma an lak zel theih nan duhsakna kan hlán a.
“Tin, hetianga mahni hláwkna ûm duh luata Mizo ṭhalai tam takte nun tihchhiat pawi tiloa ruihhlô zuar an awm ṭhin erawh hi chu ZPM Ṭhalai chuan pawi kan ti takzet a, ruihhlôa sumdawnna hi Ram leh hnam hmelma nihna a ni tih hriaa a ti ṭhin te’n, he sumdawnna ṭhalo, hnam anga min suat theitu hi chhunzawm tawhlo turin ZPM Ṭhalai chuan kan ngên tak meuh meuh a ni.
“Mizoram State zimte, International leh State dang ramriin a hual vel, ruihhlô tawlh rûkna kalkawng a miṭhenkhat te’n an hman mêk lai leh Mizo ṭhalai tam tak te’n, damdawi hman sualna avanga Nunna hlu tak an lo chân phah tawh fo bakah, damdawi hman sualnain a tih buai mêk ṭhalai tam tak te chhanchhuak tura ruihhlô do kawnga Sawrkar leh kohhran bakah NGO pawl hrang hrangte hmalak mêkna hi ZPM Ṭhalai Hqrs chuan theihtawp chhuahin a thlawp tlat zel dawn a ni,” tiin an tarlang.
