Vawiin khan Commissionerate of Excise & Narcotics Conference Hall ah Excise & Narcotics Department chuan ruihhlo do chungchanga kohhran thalai hruaitute nena inkawmhona an buatsaih a. A hawnna inkhawm hi Chief Minister Pu Lalduhoma chuan khuallian niin a hmanpui.
Thusawiin khuallian chuan, ruihhlo dona leh thalaite hmakhua ngaitu Excise Minister kan nei hi a vanneihthlak hle a, vawiina inkawmhona a buatsaih pawh hi a lawmawmin a bengvar hlein ka hria. Thalaite ruihhlovin min run mek a, a do let turin thalaite bawk sipaiah kan siam a ngai a, chumi bul chu kan tan a ni. Sawrkar min thawhpui rawh u kan ti satliah lo, kan thawkho zawk dawn a ni, a ti. Ruihhlo miin a ngaih tawh chuan a hmangaih zui tlat thin a, chu chuan a chhungte hnen ata a la hrang hret hret a, chhungkaw kimin maicham kan buatsaih hlei thei lova, nupa inthenna te a pung a, chhungkuaah Pathian ram a thleng thei thin lo a ni, a ti. Fate enkawlna kawngah pawh hian kan inzir thar te a tulin ka hria, inchhung sekrek engmah khawihtir lo khawpa duat te hi a fel lo thei. An rilru leh taksa hi hriam takin kan buatsaih zawk tur a ni a, nawmsak hi kan zo lo fo thin a ni, a ti. Kan thalai, a bikin mipate ruihhlo vangin an liam zel a, mi tam tak hman tlak lohvin a siam bawk a. Hei hian pasal tur a titlem zela, thalai thawkchhuak thei lo an pung thur thur a, kan hnam hi a nghawng thuk em em a ni. Ruihhlo dona hi sawrkar hian tih mai mai a tum lo tih he thila inhnamhnawih thin te leh mi tinin min hriatsak ang che u. Department te leh Excise Department ngei pawh fimkhur tak leh dik taka kal turin ka ngen che u a ni. “Huanpal hian a ven tur thlai kha pet thin se, chu huanpal chu thlak vat a ngai” tihna a ni, a ti. Ruihhlo dona kawnga hmalak dan turah Central YMA hruaitute a sawipui tawh thute pawh a tarlang a ni. Chief Minister hian tlawmngaipawlte tichak tura Excise Acts han siamrem pawh a tul chho dawn niaa a hriat thu a sawi bawk. Hmanlai chuan kan piputen ramhuaite an hlauva, pu vana te an hlau a, fimkhur takin an nung thin. Tunah chuan miin Pathian a hlau lova, ramhuai a hlau lova, sawrkar a hlau bawk silova, a zalen lutuka chu chu a zo ta thin lo a ni. Vawiin atang chuan Excise Department hi ruihhlo tawlh ruk chingte leh a kaihhnawih dan bawhchhiate tan lo hlauhawm tawh ang che u, a ti. An department harsatna te chu sawrkarin theihtawp chhuaha a ngaihtuahsak tur thu a hrilh bawk a ni.
Kal khawmte lawmna thu sawitu Pu Lalnghinglova Hmar, Minister, Excise & Narcotics Department chuan, vawiin hi kan department tan hun pawimawh a ni a, ruihhlo dona hi thalaite nena kalpui ngai a nih avangin kohhran thalaite nen kan inrawnkhawm dawn a ni. Sawrkarin a tihturte ringawt kan sawi dawn lova kohhran thalaiah engtinnge ruihhlo kan dovang tihte pawh kan sawiho anga sawrkar nena thawhho dan kan ngaihtuah dawn a ni. Kohhran thalai tangkaina sawrkarin a hriaa, in kalpui mek member te thatna tura in hnathawh thin kha nasa zawka kan kalpui theihnan kan titiho dawn a ni. Inrinniah he hun hi kan buatsaih a, karleh lama Delhi a training ngai kan nih vang a ni. Seventh Day kohhran te hnenah thuphachawina kan thlen tawh a, an thalai hruaitute nen hun remchang hmasaa inkawmhona buatsaih kan remti a ni, a ti bawk. Excise Minister hian kohhrantin thalai hruaitute chu an inkhawmpuiah ruihhlo that lohzia zirtirna thu sawina hun minute sawm tal ruahmansak turin a ngen a ni.
Pu Peter Zohmingthanga, Jt. Commissioner of Excise & Narcotics chuan an department dinhmun leh hnathawh dan tlangpui tarlanna a nei a, thawktu hi an vaiin 478 an awm mek a ni. An chhinchhiah danin kum 1984 atanga nimin thlengin mi 1811 ruihhlo vangin an thi tawh a, an zinga 1592 hi mipa an ni a, 219 te hi hmeichhia an ni. Chhinchhiah loh tam tak an la awm an ring. Nikumah bik mi 74 ruihhlo vangin an thi a, kuminah mitthi 1 kan nei leh tawh a ni.
