Rualbanlote thutna tur bik City Bus-ah ruahman

Aizawl khawpuia City Bus service-ah rualbanlote thutna tur a bika hauhsak anni a, vawiin khan hemi atana chhinchhiahna thuziak, sticker bel hnatlang neih a ni.
State Commissioner For Persons with Disabilities leh Aizawl City Bus Drivers Association-te hmalaknain rualbanlo te pual thutna bik hi hauhsak anni a. Sticker bel hnatlang hi Bus terminal, Ngaizel ah neih niin hnatlang ah hian Aizawla college hrang hrang 10 atangin NSS te leh bengngawng – tawngtheilo te zirna In, Ephatha special school zirlaite an thawk chhuak a ni.
Aizawl city bus-ah hian lirthei khalhtu thutna hnung chiah tlar hmasa ber chu rualbanlo te thutna atan hauh a ni a. Hnathlang a tel, PWD Commissioner, Vanlaldiki Sailo chuan Sorkar in rualbanlo te tan hamthatna a duan te, ataka kalpui chhoh mek zel ani chu lawmawm a tih thu a sawi a, Transport Authority of India in rualbanlote tan mipui phur lirthei hrang hrangah an tan thutna hauhsak tura a tih angin Mizoramah pawh a vawi khat nan he ruahmanna hi Siam a nih thu a sawi.
Aizawl City Bus Driver Assn. hotute chuan rualbanlo te tana thutna hauhsak chungchang ah theih tawp a an tan tlan tur thu an sawi a, dik taka ken kawh anih theih nan bus khalhtute leh bus chuan man khawntute zirtirna pek annih tur thu an sawi.