Lunglei District Youth Congress Committee (LDYCC) leh Mizoram Pradesh Youth Congress Committee (MPYCC) te chuan Chhim lamin Power an hmuh na tur atana hmun pawimawh tak mai Khawiva kawng siam mek chu a hmunah an tlawh a. “Tuna Khawiva kawng siam mek hi March 2020 kuma bul tan tawh niin kawng siam nan hian Sawrkar in Rs 404.19 lakhs an dah a, hemi atang hian Kum 2020 chhung khan Mizoram Sawrkar chuan Departmental Work, Contractor mi hrang hrang 13 kal tlang in Retaining wall pathum (3) – Rs 1065000/-, Slab Culvert paruk (6) – Rs 651000/- leh RCC Side Drain (2.65 Km) Rs 8284000/- a zavai in Rs 100 lakhs seng in an lo siam tawh a, hetianga hna hrang hrang mit tlung lo taka an thawh tawh hnuah hian kumin kum tir khan Khawiva kawng siam hna DIET (Melte) penga atanga 132 KV Sub Station Khawiva thleng black topping khawih mek chu duhthu a sam lo hle a, kawng siamna tur atana hmanrua an hman balu leh rora te phei chi Third class pawh tling pha lo niin kawng siamna atana hmanrua an hman balu phei chu kawng sira vaivut ang lek chauh a ni a, kawng siam na hmun ah hian a bulthut te hi chhem fai mumal lova vaivut chungah black topping tih tawp a nih bak ah kawng an chhun chhah zawng hi 10 mm pawh tling lo a ni a, naupang school kal haw in an chhuih khawh mai hlauhawm khawp a pan leh chhia a nih avang hian Khawiva kawnga kal thin te tan pawh dim dawih a ngai dawn hle a, uluk taka kawngpui an rah loh hial te pawh a ngai mahna!,” tiin thuchhuah an siam nghal.
Thuchhuahah chuan, “Hetianga Chhim mipui ten Power & Electricity ah kan innghahna leh hmun pawimawh tak mai panna kawng heti taka Sawrkar in a ngaihthah leh a siam na tur kawng atan pawh a sum beitham tak a dah hi Chhim mipuite zah lohna leh in ngaihthah na lian tak a ni a, hei vang hian LDYCC chuan he Khawiva kawng siam mek hi hei aia tha zawka siam a nih loh chuan kan vil zui reng dawn a, a chhiat a that ah hian sawrkar in mawh a lak ngei na tur leh tun aia tha zawka an siam theih na tur in kan vil reng dawn a ni,” an ti.
Khawiva kawng siam mek en ho na ah hian Dr. Lalmalsawma Nghaka, Mizoram Pradesh Youth Congress Committee, President leh a thawhpui ten LDYCC hruaitute an tawiawm a, Dr. Mala chuan “Lunglei mipuiten kan mamawh leh kan tana pawimawh em em kawng heti tak maia ngaihthah a ni leh hna tha pawh a thawktuten an thawh theih loh na tur atana Sawrkar in beitham tak sum a dah hi Lunglei mipuite in zahlohna leh in palzutna lian tak a ni a, helai kawng hi Congress Thalai te chuan kan vil zui zel dawn a ni” a ti.
LDYCC chuan, “Lunglei mipuiten kan chanvo dik tak kan chan zel theihnan theih tawp kan chhuah zel dawn a, Tuna DIET peng atanga Khawiva Sub Station panna kawng thawh loh aia thawh ve chauh, fur khat chu sawi loh ruah tui vawikhat tla in a hnawl bo nghal mai mai tura kawng luan hi kan duhkhawp lova hei aia tha zawka hna thawh a nih ngei theih nan Lunglei mipuite tan kan ding zel dawn a ni.
“LDYCC chuan khawiva kawng tha taka siamtha leh tur leh uluk taka kawngsiamna hmanrua te en dik a atha thei ang ber hmang turin MNF sawrkar chu a phut tlat a, ruahtui vawikhat tla pawh dawl zo lo tur kawng siamtu sawrkar MNF hi kan dem tak zet zet a ni,” tiin an tarlang a ni.
