Vawiin hian Ramhlun Venglai Presbyterian Kohhran Pavalai chuan Kolasib District-a Bukpui leh Thingthelh khuate tlawhin Krismas thilpek engemaw zat an sem a. Christmas Charity hi kum tina an kalpui thin a nih angin vawiin atangin fehchhuah hi an tan a ni.
Ramhlun Venglai Presbyterian Kohhran Pavalai Pawl Chairman Dr. R. Lalengmawia chuan Charity neia an fehchhuah chhan Bukpui Hall-ah sawiin, “Kum 2008 atangin Krismas charity hi kan lo kapui tawh a, COVID avangin kan han chawl leh a. Hei kan chhunzawm leh thei ta a ni,” a ti.
Thilpek hi Thingthelhah mi 20, Bukpuiah mi 10 hnena an hlan bakah, Ramhlun Venglaiah mi 10 hnenah Ramhlun Venglai Presbyterian Kohhran Pavalai Pawl hian Krismas thilpek (Charity) an hlan leh ang. Chairman chuan, “Aizawlah Home hrang hrang pali (4) tal pe thei ila kan ti a. Hei hi kan kalphung tlangpui a ni a, Home hi an lian tham deuha pek tam a ngaih dawn avangin pali hi kan thlang chhuak a ni,” a ti.
“Kan duh ber chu kan sum leh pai hi eng tham a ni lo a. Lal thar lo piang chibai kan buk tlanna tur a ni a, hei hi min lo hriat sak ula kan ti a ni. A hmanna lamah pawh lal thar chibaina tlaka hman ni se kan ti a ni,” Dr. R. Lalengmawia chuan a ti. Ramhlun Venglai Pavalai hi member 50 chuang zet an feh chhuak a ni.
